Ադրբեջանական Day.az կայքի փոխանցմամբ, Ռուսաստանի նախագահ Դմիտրի Մեդվեդևը երեկ ստորագրել է խաղաղ նպատակներով ատոմային էներգիայի գործածման ոլորտում ռուս-թուրքական համագործակցության միջկառավարական համաձայնագրի վավերացման մասին օրենքը, որը կնքվել էր 2009 թվականի օգոստոսի 6-ին, Անկարայում:
Համաձայնագրով նախատեսվում է համագործակցել հետևյալ ուղղություններով` գիտական հետազոտություններ ու մշակումներ, էներգետիկ և հետազոտական ռեակտորների շահագործում, միջուկային նյութերի տրամադրում, ուրանային հանքավայրերի հետախուզում ու մշակում, միջուկային անվտանգություն, ռադիացիոն պաշտպանություն, շրջակա միջավայրի պաշտպանություն և այլն:
Հիշեցնենք, որ ապրիլի 22-ին Պետդուման վավերացրել էր ատոմային էներգիայի համագործակցության ռուս-թուրքական համաձայնագիրը: Իսկ 2010 թվականի վերջին Պետդուման վավերացրել էր Թուրքիայի միջերկրածովյան Մերսին նահանգի Աքքույու վայրում Ռուսաստանի կողմից թուրքական առաջին ատոմակայանի կառուցման ու շահագործման մասին համաձայնագիրը: Աքքույուի ատոմակայանը տարեկան կարտադրի մոտ 35 տրիլիոն կՎտ/ժամ էլեկտրաէներգիա: Նախագծի ընդհանուր արժեքը գնահատվում է 20 միլիարդ դոլար: