Վրացական Georgia Times կայքի փոխանցմամբ, ռուս փորձագետ Կոնստանտին Սիվկովը հայտարարել է, որ Վրաստանը կարող է հերթական ռազմական հակամարտությունը սանձազերծել Աբխազիայի ու Հարավային Օսիայի դեմ.
«Վրացական զինված ուժերն արդեն լիովին վերականգնվել են 2008 թվականի օգոստոսյան ջախջախումից հետո: Դրանք զինված են ժամանակակից սպառազինությամբ, ինչը իրագործվել է առաջին հերթին ԱՄՆ-ի ու Իսրայելի ցուցաբերած օգնության շնորհիվ: Նրանք Թբիլիսիին հատկացրել են անգամ զենիթահրթիռային, այդ թվում՝ Patriot, համակարգեր:
Արևմուտքի օգնության արդյունքում վրացական բանակը կարող է հաջողությամբ հանդես գալ ընդդեմ հավանական հակառակորդի ծանր զրահատեխնիկայի:
Պատերազմի վերսկսման առիթ գտնելը շատ հեշտ է: Դա կարող է լինել սահմանային որևէ միջադեպ կամ ցանկացած այլ սադրանք: Միևնույն ժամանակ պատերազմի հնարավոր վերսկսման համար գոյություն ունի երկու գլխավոր գործոն. Աբխազիայի և Հարավային Օսիայի անվտանգության երաշխավոր հանդիսացող Ռուսաստանի ներքաղաքական հնարավոր անկայունությունը և վրացական ղեկավարության համոզվածությունն Արևմուտքի աջակցության հարցում: Արևմուտքը կարող է ֆինանսական պատերազմի օգնությամբ նպաստել Ռուսաստանում ներքաղաքական անկայունության հրահրմանը:
Եթե ուշադիր հետևելու լինենք նախագահ Սաակաշվիլիի հայտարարություններին, ապա կտեսնենք, որ նա իսկապես հարմար առիթի է սպասում Աբխազիայի նկատմամբ կորսված վերահսկողությունը վերականգնելու համար: Կարծում եմ` դա սարերի ետևում չէ»:
Հիշեցնենք, որ օրեր առաջ Վրաստանի զինված ուժերի հիմնադրման 20-րդ տարեդարձին կայացած «Վազիանի-2011» խորագրով զորավարժությունների ընթացքում Սաակաշվիլին հայտարարել էր. «Բնականաբար, բոլոր զորավարժությունների ժամանակ թշնամու կերպարը կրում է հիպոթետիկ բնույթ, սակայն մենք քաջ գիտենք, թե ով է ներխուժել Վրաստան, ով է ռազմակալել մեր տարածքները, և ով է շարունակում Վրաստանի հանդեպ ագրեսիվ պլաններ կազմել: Մենք մեր թշնամու վերաբերյալ պատրանքներ չունենք:
Վերջին տարիներին մենք արագացրել ենք վրացական բանակի արդիականացման աշխատանքները, որպեսզի ապագայում այն ի վիճակի լինի կատարելու «գրեթե անհնարին» առաջադրանքներ»: