Newsru.com կայքի փոխանցմամբ, Վրաստանում վիրավորվել է ՆԳՆ բարձրաստիճան մի պաշտոնյա` գլխավոր տեսչության պետ Վասիլ Սանոձեն: Վերջինս քունքի շրջանում ստացած հրազենային վնասվածքով փոխադրվել է հիվանդանոց, ուր նրան անհապաղ վիրահատել են:
Հիվանդանոցում, ուր այժմ գտնվում է ՆԳՆ բարձրագույն ղեկավարությունը, ուժեղացվել են անվտանգության միջոցառումները: ՆԳՆ վարչակազմի ղեկավար Շոթա Խիզանիշվիլիի խոսքերով` Սանոձեն պատահաբար է իր զենքով վիրավորել իրեն:
Վրաստանի նախագահի մամլո քարտուղար Մանանա Մանջգալաձեն միայն հաստատել է, որ Սանոձեի վիճակը ծանր է` հավելելով, որ զենքը պատահաբար կրակել է մաքրվելիս:
Վրացական լրատվամիջոցների համաձայն, բուժումը շարունակելու համար Սանոձեն ուղարկվելու է արտերկիր: Նրանց տվյալների համաձայն, Սանոձեն իր արտասահմանյան հյուրերի հետ գնացել է ռեստորան, որտեղից տուն է վերադարձել առավոտյան ժամը 4-ին, ինչից քիչ անց էլ հնչել է կրակոցը:
Նշենք, որ Սանոձեի անունը շոշափվում է Միացյալ վրացական բանկի միջազգային հարաբերությունների դեպարտամենտի ղեկավար Սանդրո Գիրգվլիանիի սպանության առնչությամբ, որը մահվանից առաջ վեճի էր բռնվել Սանոձեի հետ:
