Չինաստանից կապիտալի արտահոսքը բացասաբար կազդի ողջ համաշխարհային տնտեսության աճի վրա՝ նախազգուշացել է ԱՄՀ ղեկավար Քրիստին Լագարդը Շանհայում G20-ի ԿԲ ղեկավարների ու ֆինանսների նախարարների երկօրյա հանդիպման բացմանը։ Այս մասին հայտնում է BBC-ն։
Նա նաև նշել է, որ 2016 թվականին ԱՄՀ-ն կանխատեսում է Չինաստանի տնտեսության 6.3 տոկոսանոց աճ։
Ավելի վաղ Չինաստանի ժողովրդական բանկի ղեկավար Չժոու Սյաոչուանը հայտարարել էր, որ ներկայում ոչ մի նախադրյալ չկա յուանի զգալի արժեզրկման համար։ «Մենք նախկինի պես ունենք բավարար տարածք և գործիքներ՝ կայուն և առողջ արժութային քաղաքականության իրականացման համար»,- ասել է Չինաստանի ԿԲ ղեկավարը։
Չինական տնտեսության աճի դանդաղումը խուճապ է առաջացրել համաշխարհային ֆինանսական շուկաներում և նպաստել էներգակիրների կտրուկ նվազմանը։
Գերմանիայի ֆինանսների նախարար Վոլֆգանգ Շոյբլեն Շանհայում հանդիպմանը նշել է, որ «Մեծ քսանյակի» երկրներին անհրաժեշտ է անցկացնել կառուցվածքային բարեփոխումներ և շարունակել իրականացնել ֆինանսական կարգավորում՝ շուկաներում փոփոխականության նվազեցման համար։