Մեծ Բրիտանիան կկորցնի իր ռազմական բազաները Կիպրոսում, եթե կղզին վերջնականապես բաժանվի: Այսպիսի հայտարարությամբ է հանդես եկել Կիպրոսի կառավարության պաշտոնական ներկայացուցիչ Ստեֆանոս Ստեֆանուն:
ИТАР-ТАСС-ի փոխանցմամբ, այդ հայտարարությունը հնչել է ի պատասխան Մեծ Բրիտանիայի նախկին արտգործնախարար Ջեք Սթրոյի հոդվածի, որտեղ վերջինս կարծիք էր հայտնել, թե Լոնդոնը պետք է սկսի դիտարկել Կիպրոսի ֆորմալ բաժանման հարցը:
Ըստ Սթրոյի` իրադարձությունների նման զարգացումը հնարավոր կլինի, եթե ՄԱԿ-ի հովանու ներքո ներկայումս ընթացող միջհամայնքային բանակցությունները անհաջողության մատնվեն:
Ստեֆանուն, իր հերթին, ընդգծել է, որ կղզու բաժանումը լուծում չէ ո՛չ Կիպրոսի Հանրապերտության, ո՛չ ՄԱԿ-ի և միջազգային կազմակերպությունների, ո՛չ էլ ԵՄ-ի համար:
«Սթրոյի արտահայտությունները հակասում են Կիպրոսի Հանրապետության և Մեծ Բրիտանիայի միջև կնքված փոխըմբռնման մասին արձանագրությանը, որը ներառում է կիպրոսյան խնդրի լուծման սկզբունքներն ու շրջանակները: Դրանցով նախատեսվում է երկգոտի երկհամայնք դաշնության հիմքով վերամիավորում, այլ ոչ թե բաժանում»,- նշել է կառավարության ներկայացուցիչը: