Քրդական Кurdishcenter.ru կայքի փոխանցմամբ, վարչապետ Էրդողանն իր նախընտրական քարոզարշավի շրջանակներում Մուշ քաղաքում ելույթ է ունեցել` կրկին ընդգծելով, որ Թուրքիայում «չկա Քրդական հարց».
«Մենք դեմ ենք բոլոր նրանց, ովքեր «խաբում» են «մեր քուրդ եղբայրներին ու քույրերին»: Մեր քվեներով մենք նրանց հստակ պատասխան կտանք ընտրությունների ժամանակ: Մենք ոչնչի չենք հասնի նրանց հետ, ովքեր փորձում են մասնատել մեր երկիրը:
Մենք երկիրը ոտքի չենք կանգնեցնի անջատողական ահաբեկչական կազմակերպության («Քրդստանի աշխատավորական» կուսակցություն, PKK) հետ: Նույնը վերաբերում է նրանց (քրդական «Խաղաղություն և ժողովրդավարություն» կուսակցություն, ԽԺԿ), ովքեր փորձում են խաթարել ժողովրդի ազատ արտահայտվելու կամքը:
Սա «մեր հողն» է, «մեր հայրենիքը», այստեղ «բացառված» են խտրականությունն ու անջատողականությունը: Մենք «միասին» կլինենք: Մենք ոչ թե բարեկամներ կամ ազգականներ ենք, այլ` «հավերժ եղբայրներ», ինչպես Սիփանն ու Արարատը, Եփրատն ու Տիգրիսը: Մենք «անբաժանելի» ենք, ինչպես երկիրն ու երկինքը: Այս երկրում այլևս «չկա Քրդական հարց», մեր քուրդ «եղբայրները» որոշակի խնդիրներ ունեն:
Քրդերի մի մասն ուրբաթ օրերն աղոթում է այստեղ, իսկ մյուս մասը, լսելով PKK-ի խորհուրդները, գնում և աղոթում է մեկ այլ վայրում: Դա «անջատողականություն» է: Մենք ոչ մի ընդհանուր բան չունենք նրանց հետ, ովքեր Ափոյին (Աբդուլլահ Օջալան) մարգարե են հռչակել: Մենք կպայքարենք բոլոր նրանց դեմ, ովքեր «խաբում են իմ քուրդ եղբայրներին»»:
Հիշեցնենք, որ օրեր առաջ Էրդողանը, հանդես գալով իր գլխավորած «Արդարություն և զարգացում» կուսակցության (ԱԶԿ) ժողովում, դարձյալ հայտարարել էր, որ Թուրքիայում «այլևս գոյություն չունի Քրդական հարց»: