Իտալական ոստիկանության իրականացրած օպերացիայի արդյունքում մաֆիայի հետ կապեր ունենալու կասկածանքով ձերբակալվել է 80 մարդ:
Այս մասին հայտնում է France Presse գործակալությունը:
40 հոգի, այդ թվում` Մարինա դի Ջոյոզա Յոնիկա փոքրիկ քաղաքի քաղաքապետը, ձերբակալվել են Կալաբրիայում «Ընդրանգետա» (Ndrangheta) խմբավորման հետ կապեր ունենալու համար:
Քաղաքապետ Ռոկկո Ֆերմինան, որն այդ պաշտոնում էր ընտրվել 2009 թ.-ին, ըստ նախնական տեղեկությունների, քաղաքային կապալները հանձնում էր մաֆիայի կողմից ղեկավարվող ընկերությունների: Ձերբակալվել է նաև մի ոստիկան, ով, ըստ հաղորդագրության, տեղեկություններ է փոխանցել «Ընդրանգետայի» դեմ իրականացվող քննությունների մասին:
Ձերբակալվածների մեջ կան նաև քաղաքային խորհրդի երեք անդամներ: Եվս 40 հոգի ձերբակալվել է Նեապոլում, այդ թվում` նաև Սիլվիո Բեռլուսկոնիի «Ազատության ժողովուրդ» կուսակցությունից տեղական ընտրություններում երկու թեկնածու: ANSA գործակալության տվյալներով, նրանց անդամակցությունը կուսակցությանն անմիջապես կասեցվել է:
Ձերբակալվածները կասկածվում են «Կամորայի» հետ կապ ունենալու մեջ:
Ավելի վաղ` ապրիլի 23-ին, տեղեկություն էր տարածվել, որ ձերբակալվել է «Սակրա կորոնա յունիտա» մաֆիոզ խմբավորման ղեկավար Ֆրանչեսկո Կամպանան:
