Թուրքական Akşam թերթի փոխանցմամբ, Տնտեսական համագործակցության և զարգացման կազմակերպությունը (OECD) հրապարակել է «Ընտանիքները փոփոխվում են» խորագրով զեկույցը:
Դրանում տեղ են գտել 39 երկրներում ընտանեկան դրության շուրջ իրականացրած հետազոտության արդյունքները: Դրանք վկայել են, որ Թուրքիայում սովի շեմին են երեխաների 24.6 տոկոսը (յուրաքանչյուր 4-րդ երեխան): Այս ցուցանիշով Թուրքիան զբաղեցրել է 3-րդ տեղը` զիջելով Իսրայելին ու Մեքսիկային: Ընդհանուր առմամբ, միջին ցուցանիշը կազմել է 12.7 տոկոս:
Զեկույցում նշված է, որ երեխաների շրջանում քաղցածության աճի պատճառը հիմնականում կանանց աշխատուժը չգործածելն է:
Նորածին երեխաների մահացության ցուցանիշով Թուրքիան առաջին տեղն է զբաղեցրել. 1000 նորածին երեխաներից 21-ը մահանում են: Ընդհանուր առմամբ, միջին ցուցանիշը կազմել է 2-3 երեխա:
Ընտանիքի բազմամարդության ցուցանիշով (միջինը 4 մարդ)` Թուրքիան Մեքսիկայի ու Չիլիի հետ կիսում է առաջին երեք տեղերը: Ընդհանուր առմամբ, միջին ցուցանիշը կազմել է 2.56 մարդ:
Հիշեցնենք, որ ապրիլի սկզբին էլ թուրքական Zaman թերթը հայտնեց, որ Թուրքիայում ամեն 4 ժամը մեկ սեռական բռնությունների է ենթարկվում մեկ երեխա: Նշվում էր, որ թուրքական փողոցներում ապրում են 50.000 երեխաներ, որոնցից 30.000-ը տարատեսակ բռնությունների են ենթարկվում: Չնայած դրան, վերջին 5 տարիների ընթացքում նրանցից միայն 5000-ն են դիմել ոստիկանություն:
