ԶԼՄ-ները պետք է միավորվեն դատարաններից խուսափելու համար

«Տարիներ առաջ տպագիր մամուլը մեկօրյա գործադուլ արեց, և մեր երեք պահաջներից երկուսի կատարումը գոնե ապահովեցինք: Այսինքն` եթե ԶԼՄ-ները գործեն միասին, շատ խնդիրներ կլուծեն»,- կարծում է «Ազգ» օրաթերթի խմբագիր Հակոբ Ավետիքյանը:
«Առավոտ» օրաթերթի խմբագիր Արամ Աբրահամյանը ևս կարևորում է դատարաններից խուսափելու համար ԶԼՄ-ների միասնական ինքնակարգավորման համակարգին և ընդհանուր վարքականոնին հետևելը։
«Ինձ համար դատարանը հեղինակություն չէ, քանի որ դատարանները եթե քաղաքական պատվեր չեն կատարում, ապա կարող են իմ հետ անձնական հաշիվներ ունենալ: Հարկավոր է հեղինակավոր խումբ: Երբ խումբն ասի, որ ես սխալ եմ, ես կընդունեմ այն, և դատի տալու հնարավորություն էլ չի լինի»,-ասում է Արամ Աբրահամյանը:
Հիշեցնենք, որ Հայաստանում 2007 թ. ընդունվել է ԶԼՄ-ների գործունեությունը կարգավորող վարքականոն, որը ստորագրել են 31 լրատվամիջոց:
«Մեզանից շատ-շատ առաջ մամուլի մարդիկ միավորվել են` ապահովագրելու իրենց դատարաններից, այսինքն՝ պետական միջամտություններից։ Մենք ինքներս դատենք մեզ, որի արդյունքում տարբեր-տարբեր երկրներում ստեղծվել են ինքնակարգավորման այդ ամբողջ մեխանիզմները»,- ասաց Հակոբ Ավետիքյանը։
Զրպարտությունն ու վիրավորանքը ապաքրեականացնող օրինագծի ընդունումը այն ժամանակ ողջունելի կլիներ, երբ Հայաստանն ունենար անկախ դատարաններ, կարծում է Ավետիքյանը։ Ըստ նրա` ճիշտ կլիներ, եթե Քոչարյանների ընտանիքը դատի տար թերթերին և որպես բարոյական վնասի փոխհատուցում պահանջեր խորհրդանշական 1 դրամ, ինչը կիրառվում է զարգացած շատ երկրներում, երբ հարցը ճշմարտության խեղաթյուրումն է, այլապես նման աստղաբաշխական փոխհատուցում պահանջելը կարող է հանգեցնել լրատվամիջոցի սնանկացման և փակման: