Թուրքական Zaman թերթի փոխանցմամբ, Թուրքիայի նախագահ Աբդուլլահ Գյուլը մարտական ինքնաթիռների ուղեկցությամբ մեկնել է Ավստրիա: Գյուլի պատվիրակության կազմում են նաև նրա կինը` Հայրունիսա Գյուլը, պետնախարար Ֆարուք Չելիքը, Եվրամիությանը Թուրքիայի լիիրավ անդամակցության գծով գլխավոր բանագնաց, պետնախարար Էգեմեն Բաղըշը:
Վիեննայում նրան հյուրընկալել է Ավստրիայի նախագահ Հայնց Ֆիշերը, որի հետ հանդիպման ժամանակ Գյուլը խնդրել է աջակցել Եվրամիությանը Թուրքիայի անդամակցությանը.
«Որևէ հիմք չկա, որ մեր եվրոպական մի շարք բարեկամներ մտահոգվում են, թե ԵՄ-ին Թուրքիայի անդամակցությունը կարող է խախտել նրա ներդաշնակությունը: Թուրքիան ցանկանում է անդամակցել ԵՄ-ին, ուր ներքին համերաշխությունը, համագործակցությունն ու ինտեգրացիան գտնվում են բարձր մակարդակի վրա»:
Ավստրիայի նախագահն, իր հերթին, նշել է, որ իրենք ամբողջովին աջակցում են Ավստրիայում բնակվող թուրքերի ինտեգրմանը և մասնավորապես գերմաներենի ուսուցմանը, որը չի կարող վերածվել ձուլման:
Գյուլը նաև նշել է, որ տարեկան Թուրքիա է այցելում ավստրիացի մոտ 500.000 զբոսաշրջիկ:
Հիշեցնենք, որ ներկայումս ԵՄ-ին Թուրքիայի անդամակցության հարցում եվրոպական երկրները պետք է բաժանել 3 խմբի` գործընթացի կողմնակիցներ (Մեծ Բրիտանիա, Իտալիա և այլն), հակառակորդներ (Գերմանիա, Ֆրանսիա, Կիպրոս և այլն) և չկողմնորոշվածներ (Դանիա և այլն):
Դեռ նախորդ տարվա աշնանը թուրք պետնախարար և փոխվարչապետ Ալի Բաբաջանը հայտարարեց. «Գերմանիան և Ֆրանսիան ԵՄ-ին Թուրքիայի անդամակցությունը դիտարկում են որպես սպառնալիք: Դրա պատճառն այն է, որ Գերմանիան ու Ֆրանսիան քաջ գիտակցում են, որ ԵՄ-ին Թուրքիայի լիիրավ անդամակցության պարագայում Թուրքիան այլևս հանդես չի գա երկրորդական դիրքերից: Այդ ժամանակ բոլորն ականատես կլինեն ոչ թե Գերմանիա-Ֆրանսիա, այլ` Գերմանիա-Ֆրանսիա-Թուրքիա առանցքին: Մենք վստահ չենք` արդյո՞ք նրանք պատրաստ են մեզ հետ կիսել այդ հզորությունը»:
Այստեղ պետք է նշել, որ ԵՄ-ին անդամակցելու հարցում Թուրքիայի հակառակորդներն ընդգծում են, որ անդամակցության պարագայում Թուրքիան բնակչության թվաքանակով կդառնա Գերմանիայից հետո ԵՄ անդամ երկրորդ խոշոր երկիրը, ինչը նշանակում է, որ նա կարող է լրջորեն ներազդել եվրոպական քաղաքականության մշակման ու որոշումների ընդունման վրա:
