Հայաստանում ազատ զանգվածային լրատվական միջոցների ձևավորման համար խոչընդոտ են հանդիսանում մասնագիտացման, համարձակության ցածր մակարդակը և ֆինանսական խնդիրները։ Այսօր հրավիրված մամլո ասուլիսի ժամանակ նման կարծիք հայտնեց «Երկիր Մեդիա» հեռուստաընկերության լրատվական և քաղաքական հաղորդումների տնօրեն Գեղամ Մանուկյանը:
Ազատ մամուլի միջազգային օրվա առթիվ հրավիրված ասուլիսի մեկ այլ բանախոս` «Ազգ» օրաթերթի գլխավոր խմբագիր Հակոբ Ավետիքյանը, մեզանում ազատ մամուլի բացակայությունը բացատրեց լրատվական շուկայի բացակայությամբ: «Մեզ մոտ մամուլի շուկան բազարի նման է, քաղաքակիրթ չէ»,- ասաց Ավետիքյանը:
Ըստ «Ազգի» խմբագրի` ազատ ու անկախ մամուլի գոյության և դատական միջամտությունից խուսափելու համար կարևոր է նաև ԶԼՄ-ների համագործակցությունը և ինքնակառավարման մեխանիզմների գործունեությունը:
Խոսելով ազատ մամուլի մասին` «Առավոտ» օրաթերթի խմբագիր Արամ Աբրահամյանն անդրադարձավ թերթերի դեմ հարուցված մի քանի դատական գործերի:
«Զրպարտության և վիրավորանքի ապաքրեականացվող օրենքն անհրաժեշտ էր, սակայն դա իրագործվում է սխալ կերպով»,- ասում է Աբրահամյանը:
Առավոտի խմբագիրը հարկ համարեց հիշեցնել նաև, որ «Եթե որևէ անձ գումարային պահանջ է ներկայացնում թերթին, ասենք` 3 միլիոն դրամ է պահանջում նրանից ու միաժամանակ հայտարարում, որ փողը կօգտագործի բարեգործական նպատակներով, ապա դատավորը բոլոր հիմքերն ունի պահանջը մերժելու: Բարոյական վնասի փոխհատուցումն իմաստ ունի այն ժամանակ, երբ վնասը կրած մարդը ունի գումարի կարիքը: Բայց ո՛չ Տիգրան Արզաքանցյանը, ո՛չ Քոչարյանը, ո՛չ մյուս օլիգարխները այդ 3 միլիոն դրամի կարիքը չունեն»: