Թագաժառանգ Ուիլյամի և Քեթրին Միդլթոնի հարսանիքը տեղի ունեցավ ապրիլի 29-ին Լոնդոնում: Այս ամենին հետևում էր ավելի քան 2 մլրդ մարդ ամբողջ աշխարհում: Սակայն հարսանիքին պակաս ուշադրությամբ չէին հետևում նաև չինացի դիզայներները` սպասելով այս արարողությանը որպես տոնի:
«Նրանց պսակադրությանը մենք անհամբերությամբ էինք սպասում՝ տեսնելու, թե ինչ զգեստ կկրի հարսնացուն»,- Chine Daily թերթը ցիտում է հարսանյաց զգեստների վաճառքով զբաղվող օնլայն խանութներից մեկի տնօրենի խոսքերը:
Երիտասարդ կին գործարար Չեն Սումյաոյի խոսքերով, այն պահին, երբ հայտնի դարձավ զգեստի դիզայների անունը, իր աշխատակիցներն ակտիվորեն գործի անցան: Տոնակատարության արդեն հաջորդ օրը հարսանյաց զգեստի կրկնօրինակը կարելի էր գնել կայքում` նախապես պատվերներ կատարելով: Ըստ նախնական տվյալների` այդ զգեստի կրկնօրինակը կարող արժենալ մինչև 300 դոլար:
Հարսանյաց արարողության համար Քեթրինի ընտրությունը կանգ էր առել Սառա Բերտոնի ստեղծած զգեստի վրա, որն աշխատում է Alexander McQueen նորաձևության տանը: Այդ զգեստն իր մեջ կրում էր ավանդական և ժամանակակից մոտիվներ, իսկ փղոսկրի գույնի ժանյակները ստեղծված էին Միացյալ Թագավորության խորհրդանիշի տեսքով` վարդեր, ուղտափուշ, նարգիզ և երեքնուկի թերթիկներ: