Պաշտոնական Մոսկվան Թբիլիսիից պահանջել է թույլատրել Ռուսաստանի դիվանագետներին հանդիպել լրտեսության մեղադրանքով Վրաստանում ձերբակալվածների հետ` պարզելու, թե արդյո՞ք նրանց թվում Ռուսաստանի քաղաքացիներ կան:
Այս մասին, ըստ ռուսաստանյան լրատվամիջոցների, լրագրողների հետ զրույցում հայտարարել է Ռուսաստանի արտգործնախարար Սերգեյ Լավրովը` սադրանք գնահատելով այն փաստը, որ պաշտոնական Թբիլիսին «թաքցնում է» ձերբակալվածներին:
«Կա հյուպատոսական ընթացակարգ: Մենք պահանջում ենք հյուպատոսական այցելության հնարավորություն: Եթե նրանք մեր քաղաքացիներն են, մենք ուզում ենք դրանում համոզվել, իսկ այդ կապակցությամբ բանակցություններ չեն տարվում: Դա սադրանք է», – հայտարարել է Լավրովը:
Նոյեմբերի 5-ին Վրաստանի իշխանությունները հրապարակեցին Ռուսաստանի օգտին լրտեսության մեղադրանքով ձերբակալված 13 մարդկանց անունները, և նշվեց, որ նրանցից 4-ը Ռուսաստանի քաղաքացիներ են` Արմեն Գևորգյանը, Ռուբեն Շիկոյանը, Պետրե Դավրիշաձեն և Յուրի Սկրիլնիկովը: Միաժամանակ վրացական լրատվամիջոցներում լուրեր հայտնվեցին, որ նրանցից 3-ը երկքաղաքացիություն ունեն` ե’ւ Վրաստանի քաղաքացի են, ե’ւ Ռուսաստանի:
Ավելի վաղ ՌԴ ԱԳՆ-ն այս գործը գնահատել էր որպես «սպիտակ թելերով կարված քարոզչական հնարք»:
Մինչդեռ Վրաստանի նախագահ Միխեիլ Սաակաշվիլին շքանշաններով պարգևատրել է Սահմանադրական կարգի պահպանման դեպարտամենտի մի շարք աշխատակիցների` ռուսական լրտեսների գործը բացահայտելու համար: Սաակաշվիլին հայտարարել է, որ լրտեսական նոր սկանդալը չի սրի հարաբերությունները Ռուսաստանի հետ, քանի որ գործ ունեն «Վրաստանի տարածքները գրաված օկուպանտի հետ»: Վրաստանի նախագահն ասել է, թե իր երկիրը պատրաստ է բանակցություններ վարել Ռուսաստանի հետ առանց նախապայմանների: