Ինչպես հայտնում է UPI կայքը, Հիթրոուի օդանավակայանում կորել է Նեպալից ժամանած արական երգչախումբը, որը Մեծ Բրիտանիայում պետք է մասնակցի երաժշտական փառատոնի:
Համերգի կազմակերպիչները և իմիգրացիոն ծառայության աշխատակիցները երեք օր շարունակ փորձում էին պարզել, թե որտեղ են գտնվում խմբի անդամները: Այդ ժամանակ փառատոնի կազմակերպիչ Դեյվիդ Պետերսոնին զանգահարել է խմբի մենակատարներից մեկը: Նա հայտնել է, որ խումբը մոլորվել է և հիմա գտնվում է մի տանը, որը Հիթրոու օդանավակայանից տասը կիլոմետրի վրա է:
«Չեմ կարողանում հասկանալ, թե նրանց ինչպես է հաջողվել մոլորվել, քանի որ այն համարը, որով ինձ ի վերջո զանգահարել են, միշտ իրենց տրամադրության տակ է եղել»,- ասել է Պետերսը: Խմբի մասնակիցների համար ուղարկվել է ավտոբուս: Սակայն մինչ մեքենան կհասներ նրանց գտնվելու վայրը, երգիչները նորից անհետացել էին: «Մենք կապվեցինք նրանց հետ և ասացինք, որ նրանց վերջին հնարավորությունն ենք տալիս: Դրանից հետո նրանք նոր նստեցին մեքենան, եկան և ելույթ ունեցան փառատոնի ժամանակ, ընդ որում՝ շատ լավ»,- ասել է Պետերսը: