«Երևակայության գավաթ» ՏՏ մրցույթի արդյունքներն ամփոփվեցին

Այսօր ամփոփվեցին «Երևակայության գավաթ» հայաստանյան մրցույթի արդյունքները, և առաջին հորիզոնականը շնորհվեց «X-Teach» խմբին, երկրորդը «Eco Friends»-ն է, երրորդը` «Anaka»-ն:
«Երևակայության գավաթ»-ն աշխարհում առաջատար միջազգային մրցույթ է ՏՏ ոլորտի ուսանողների համար, որը նախաձեռնվել և անցկացվում է «Մայքրոսոֆթ» կորպորացիայի կողմից: Մրցույթը նպատակաուղղված է օգնելու ՏՏ ոլորտի ուսանողներին բացահայտել ու զարգացնել ոլորտում առկա նոր մոտեցումները, ի հայտ բերել նորարակական ծրագրային լուծումներ և փաթեթներ:
Մրցույթն առաջին անգամ անցկացվել է 9 տարի առաջ: Այսօր մրցույթին մասնակցում են ավելի քան 100 երկրներ: Յուրաքանչյուր մրցույթ սկսվում է տեղական, տարածաշրջանային կամ առցանց մրցույթներով, որոնց հաղթողները մասնակցում են ամեն տարի տարբեր երկրներում անցկացվող միջազգային եզրափակչին: Յուրաքանչյուր տարի մի տեղ հավաքելով աշխարհի լավագույն ՏՏ ուսանողներին և տրամադրելով նրանց անհրաժեշտ ռեսուրսներ՝ մրցույթը հնարավորություն է տալիս առավել ընդարձակ և նորարարական աշխարհայացք զարգացնել, ծանոթանալ տեխնոլոգիական վերջին նորամուծություններին, ձևավորել մասնագիտական ծանոթություններ, գտնել նոր ընկերներ:
Հայաստանում մրցույթն իրականացվում է 2008 թ. «Մայքրոսոֆթ» ինովացիոն կենտրոնի, «Մայքրոսոֆթ»-ի հայաստանյան գրասենյակի և Ձեռնարկությունների ինկուբատոր հիմնադրամի համատեղ վարչարարությամբ:
Այս տարի «Երևակայության գավաթ» մրցույթի շրջանակում առաջարկվել է «Պատերկերացրո՛ւ աշխարհ, որտեղ ՏՏ-ն օգնում է հրատապ խնդիրների լուծմանը» թեման:
Նշենք, որ առաջին մրցանակ ստացած թիմին հնարավորություն կընձեռվի մասնակցել միջազգային «Երևակայության գավաթ» մրցույթին, որը տեղի կունենա ԱՄՆ-ի Նյու Յորք քաղաքում 2011 թ. ամռանը: