Սերժ Սարգսյանի այցը Շվեյցարիա անմիջականորեն կապվում է հայ-թուրքական գործընթացի վերսկսման հետ, քանզի Շվեյցարիան այն երկիրն էր, որ միջնորդն ու նախաձեռնողը եղավ այդ գործընթացի։
ԱՊՀ երկրների ինստիտուտի հայկական մասնաճյուղի տնօրեն, քաղաքագետ Ալեքսանդր Մարկարովն «Առաջին լրատվական»-ի հետ զրույցում հիշեցրեց, որ շվեյցարական կողմը հենց Հայաստանում հայտարարել է, որ Շվեյցարիայի առաքելությունն ավարտվել է այն ժամանակ, երբ Ժնևում ստորագրվել են համապատասխան փաստաթղթերը: Սակայն, ըստ Մարկարովի, չի կարելի բացառել, որ
պաշտոնական հանդիպումների ժամանակ քննարկվել է Շվեյցարիայի՝ որպես միջնորդ երկրի դերը հայ-թուրքական հարաբերությունների կարգավորման հարցում և այն հանգամանքը, որ Շվեյցարիան շարունակի հանդես գալ որպես միջնորդ հայ-թուրքական հարաբերությունների վերակենդանացման և վերահաստատման համար. «Ընդհանուր առմամբ, այսօր արևմտյան դիվանագիտությունը շահագրգռված է, որ Թուրքիան և Հայաստանը գտնեն ընդհանուր եզրեր»:
Օրերս Թուրքիայի վարչապետ Էրդողանը հայտարարել էր, թե Նախիջևանը և Ղարաբաղը հենց Թուրքիայի խնդիրն են: Հարցին, թե այն պարագայում, երբ Թուրքիան բացեիբաց խոսում է նախապայմանների մասին, ինչպես կարող է արևմտյան դիվանագիտությունը վերակենդանացնել հայ-թուրքական հարաբերությունները, Մարկարովը պատասխանեց. «Տվյալ պարագայում մենք գործ ունենք մեկի ցանկությունների և մյուսների պատրաստակամության ու հնարավորությունների հետ: Թեև Արևմուտքը շահագրգռված է հայ-թուրքական երկխոսության վերսկսմամբ, սակայն անհրաժեշտ է հաշվի առնել առկա իրականությունը»:
Մարկարովի խոսքերով, այսօրվա Թուրքիայի նախապայմաններ պարունակող դիրքորոշումն ընդունելի չէ հայկական կողմի համար, և պարզ է, որ գործընթացի վերսկսման մասին կարելի է խոսել միայն այն դեպքում, երբ թուրքերը պատրաստ կլինեն բանակցությունները վերսկսել առանց նախապայմանների: