ՌԴ Պետդումայի ԱՊՀ հարցերով հանձնաժողովի նախկին ղեկավար Կոնստանտին Զատուլինը, որը վերջերս զրկվել է այդ պաշտոնից, բրիտանական The Guardian-ին տված հարցազրույցում ասել է, որ ՌԴ նախագահ Դմիտրի Մեդվեդևը պատրաստվում է երկրորդ անգամ առաջադրվել որպես ՌԴ նախագահի թեկնածու: Այս կարծիքը նա արտահայտել էր իր պաշտոնը լքելուց որոշ ժամանակ անց, սակայն Regnum գործակալությանը տված հարցազրույցը մի քանի ժամ անց անհետացել էր վերջինիս կայքից:
Պատգամավորը բրիտանական թերթին ասել է, որ Մեդվեդևի շրջապատն իրականացնում է «հակապուտինյան» ծրագիր: Զատուլինը հայտնել է, որ Մեդվեդևի օգնականներն ամեն ինչ անում են թուլացնելու Պուտինի դիրքերը խորհրդարանում: «Մեդվեդևը ցանկանում է մնալ, սակայն խախտել է համաձայնագիրը, և հիմա միակ բանը, որ մնում է Պուտինին` նրան ետ քաշվել համոզելն է»,- ասել է Զատուլինը: Իր հրաժարականը Զատուլինը մեկնաբանել է որպես Մեդվեդևի թիմի աշխատանքի հետևանք: Զատուլինը կարծիք է հայտնել նաև, որ Կրեմլի գլխավոր գաղափարախոս Վլադիսլավ Սուրկովը նախապատրաստական աշխատանքներ է տանում «Արդար Ռուսաստան» կուսակցությունը Մեդվեդևի հենարանը դարձնելու համար:
«Մեդվեդևը որոշել է առաջադրել իր թեկնածությունը: Նա որոշակի աջակցություն է զգում»,- հայտարարել է Զատուլինը, որը նաև համոզված է, որ առաջիկայում կարելի է սպասել Պուտին-Մեդվեդև հակամարտության: