Սերժ Սարգսյանն այսօր պաշտոնական այցով գտնվում է Շվեյցարիա: Ժնևում գտնվող «Շվեյցարիա-Հայաստան» ընկերակցության նախագահ Սարգիս Շահինյանը «Առաջին լրատվականի» հետ զրույցում նշեց, որ Սերժ Սարգսյանի այցը Շվեյցարիա անմիջականորեն կապված է հայ-թուրքական արձանագրությունների վերակենդանացման հետ: Նա նաև նշեց, որ ամենևին էլ պատահական չէր այն, որ Հայոց Ցեղասպանության օրվանից` ապրիլի 24-ից որոշակի ժամանակ առաջ Հայաստան եկավ Շվեյցարիայի նախագահը, այժմ էլ այդ օրվանից ընդամենը մեկ շաբաթ անց Սերժ Սարգսյանն է փոխայց կատարում. «Այս երկու հանդիպումները Շվեյցարիայի և Միացյալ Նահանգների մշակած հստակ ծրագիրն է` վերակենդանացնել հայ-թուրքական գործընթացը»:
Նկատենք, որ նախօրեին Թուրքիայի վարչապետ Էրդողանը հայտարարել էր, որ Ղարաբաղը և Նախիջևանը Թուրքիայի խնդիրն են: Հարցին, թե նման նախապայմանի դեպքում, ինչպե՞ս կարող է վերակենդանանալ հայ-թուրքական գործընթացը, Շահինյանը պատասխանեց. «Արցախի խնդիրը գերագույն խոչընդոտն է այդ հարաբերություններում: Որքան էլ որ ՀՀ արտգործնախարարը և նախագահը ժխտեն, բայց այդ հարցն ընդգրկված է արձանագրությունների մեջ և դա ես չեմ ասողը, այլ Թուրքիայի արտգործնախարարը` իր հարցազրույցներից մեկում»:
Շահինյանը նշեց, որ անհնարին էր, որ Հայաստանի և Թուրքիայի միջև ընթացած բանակցությունների մեջ չշոշափվեր ղարաբաղյան հարցը: Ըստ Շահինյանի, չի բացառվում, որ Շվեյցարիան միջնորդել է հայ-թուրքական հարաբերություններում, պայմանով, որ կլուծվի ղարաբաղյան հարցը, սակայն որոշ զիջումներով: Շահինյանի խոսքերով հստակ է, որ Հայաստանը պետք է զիջի, բայց թե ինչպիսին են լինելու այդ զիջումները, դեռևս պարզ չէ: