Շուրջ 80 մարզիչներ հանձնել են մարզչական որակավորման թեստային քննություն, որն առաջին անգամ է անցկացվում Հայաստանում։ Այս մասին հաղորդում է Հայաստանի բռնցքամարտի ֆեդերացիան:
Քննության արդյունքում մարզիչները կստանան համապատասխան հավաստագիր, առանց որի տվյալ մարզիչը իրավունք չի ունենա բռնցքամարտիկ ներկայացնել Հայաստանի առաջնությունում:
«Քննության արդյունքում մարզիչները կստանան համապատասխան հավաստագիր։ Սա չի վերաբերում այն մարզիչներին, որոնք AIBA-ի կողմից ունեն համապատասխան հավաստագիր: Մարզչական որակավորման քննությունը Հայաստանում անցկացվում է առաջին անգամ: Այս ամենի նպատակը մեկն է՝ կանխել պատահական մարդկանց մուտքը մարզչական աշխարհ:
AIBA-ի կանոնադրության համաձայն՝ մարզիչները պարտադիր պետք է հանձնեն որակավորման քննություն: Այն մարզիչները, որոնք չեն ունենա համապատասխան հավաստագիր ֆեդերացիայի կողմից, իրավունք չեն ունենա Հայաստանի առաջնությունում ներկայացնել բռնցքամարտիկներ։ Հավաստագիրը տրամադրվում է 4 տարով: Բացի դրանից մարզիչները կանցնեն նաև դասընթացներ: Այս քննությունը դեռևս մեկ աստղի համար է: Առավելագույն որակավորումը 3 աստղ է»,- Հայաստանի բռնցքամարտի ֆեդերացիան փոխանցում է ֆեդերացիայի նախագահ Արթուր Գևորգյանի խոսքը:
Լուսանկարը՝ Հայաստանի բռնցքամարտի ֆեդերացիայի ֆեյսբուքյան էջի: