«Իմ կարծիքով, ինչ-որ մի դաշտ պետք է, որպեսզի լրատվամիջոցները համագործակցեն կամ առնվազն կարողանան իրենց կարծիքը փոխանցել առկա պրոբլեմների մասին: Բայց հարց է, թե այս խորհուրդն ինչքանով կկարողանա ազդել դատարանների վրա, հետագայում էլ իրավական պրակտիկայի վրա»,- անդրադառնալով Տեղեկատվական վեճերի խորհրդի հիմնադրման հանգամանքին` «Առաջին լրատվականի» հետ զրույցում կարծիք հայտնեց «Երկիր» օրաթերթի խմբագիր Բագրատ Եսայանը:
Հիշեցնենք, որ «Երկիր» օրաթերթի դեմ ևս դատական հայց կա` զրպարտությանը և վիրավորանքին վերաբերող հոդվածներով: Իսկ նորաստեղծ խորհրդի նպատակը հենց նման դեպքերին առնչվող գործերի վերաբերյալ մասնագիտական եզրակացություններ պատրաստելն է:
Եսայանը նկատեց, որ իրենք շատ բաց են գործել այս ընթացքում, և դատական գործի բոլոր մանրամասները հայտնի են. «Մենք որևէ մեկից որևէ բան չենք պահում, և եթե նորաստեղծ խորհուրդը կարիքը զգա «Երկիրի» դեպքը վերցնել և քննարկման առարկա դարձնել, բնականաբար մենք դրան դեմ չենք լինի, բայց չեմ կարծում, որ հատուկ կդիմենք` այդ խորհրդից հատուկ սպասելիք ունենալով»:
