Ինչպես այսօր պարզվել է ռուսաստանյան ամենահայտնի Yandex ընկերության գլխավոր խմբագիր Ելենա Կոլմանովսկայայի «Էխո Մոսկվի» ռադիոկայանին տված հարցազրույցից, ընկերությունը ստացել է հարցում Անվտանգության դաշնային ծառայությունից (ФСБ)` իրենց տրամադրելու հայտնի բլոգեր Ալեքսեյ Նավալնու հակակոռուպցիոն նախագիծը պաշտպանող օգտատերերի «Yandex.Գումար» համակարգում ունեցած տվյալները:
Նա ասել է, որ հարցումը եղել է հենց Նավալնու և մոտ 100 օգտատերերի տվյալների վերաբերյալ, ինչն էլ ընկերությունը կատարել է և տրամադրել դրանք: Ելենա Կոլմանովսկայան նաև ասել է, որ ФСБ–ն պարբերաբար նման հարցումներով է հանդես գալիս:
Աղմուկը սկսել է այն բանից հետո, երբ Նավալնիին աջակցած օգտատերերը հայտարարել են, որ իրենց անձնական տվյալները հայտնվել են ռուսական «բազեների»` «Նաշի» երիտասարդական նախաձեռնության անդամների ձեռքին:
Հակակոռուպցիոն նախագծի հեղինակ Ալեքսեյ Նավալնին ասել է, որ պատրաստվում է ավելի ուշ մեկնաբանել այս տեղեկությունը: Նրա նախագիծն ուղղված է չինովնիկների անօրինական ստացած եկամուտների բացահայտմանը, որն իրականացնելու համար Նավալնին հանգանակություն է սկսել: