«Լրագրողներ առանց սահմանների» կազմակերպությունը հատուկ հայտարարություն են հրապարակել, որտեղ մասնավորապես նշվում է, որ «աստղաբաշխական փոխհատուցում վճարելու պահանջով դատական հայցերը սպառնալիք են հայաստանյան թերթերի համար»:
Կազմակերպությունն անհանգստացած է այն դատական հայցերի առթիվ որ ներկայացվել են ընդդեմ հայաստանյան պարբերականների: Ըստ կազմակերպության ներկայացուցիչների, մտահոգության տեղիք է տալիս թերթերից պահանջվող փոխհատուցման անհամարժեք չափը, ինչը վտանգում է այդ պարբերականների գոյությունն ու նպաստում դրանցում ինքնագրաքննության մթնոլորտի ձեւավորմանը. «Թերթերը լռեցնելու նպատակով դատական հայցերի օգտագործման պրակտիկային հարկ է վերջ տալ»:
«Լրագրողներ առանց սահմանների» կազմակերպության հայտարարության մեջ ընդգծվում է, որ թեեւ 2010թ. ապրիլին զրպարտության եւ վիրավորանքի համար քրեական պատիժը վերացվեց եւ դա ընկալվեց որպես քայլ դեպի ժողովրդավարություն, այնուհանդերձ` «պարբերականների դատական հետապնդումները շարունակվում են»:
Կազմակերպության հայտարարության մեջ նաեւ արձանագրված է, որ միայն 2011 թ. առաջին եռամսյակում մամուլի դեմ ներկայացվել է 12 դատական հայց եւ դրանց գլխավոր թիրախն անկախ պարբերականներն են. ««Ժամանակ» օրաթերթի դեմ ներկայացվել է 3 դատական հայց, հայցեր են ներկայացվել նաեւ «Հայկական ժամանակ» եւ «Հրապարակ» պարբերականների դեմ: Հայցվորի դերում հաճախ է հանդես գալիս նախկին նախագահ Ռոբերտ Քոչարյանի ընտանիքը: Ինքը` Քոչարյանը, նույնպես վերջերս դիմեց դատարան` «Հրապարակ» օրաթերթին մեղադրելով զրպարտության եւ վիրավորանքի մեջ: Թեեւ հայցով դատարան դիմելու որոշակի հիմքեր գուցե առկա էին, այնուհանդերձ լիովին հիմնազուրկ էր պարբերականի գույքի եւ դրամական միջոցների վրա արգելանք դնելու` հայցվորի ներկայացրած պահանջը: Թեեւ այդ որոշումը հետագայում վերանայվեց, այնուամենայնիվ նախկին նախագահի գործողությունները շարունակում են վտանգ պարունակել, քանի որ կարելի է ենթադրել, որ ներկայացվող հայցերի իրական նպատակը պարբերականի սնանկացումն է»:
«Լրագրողներ առանց սահմանների» կազմակերպությունն իր հայտարարությունում նաեւ նշում է, որ շարունակելու են ուշադրությամբ հետեւել վերոնշյալ գործերի ընթացքին, ինչպես նաեւ բացի այդ դատական հայցերից, կազմակերպության ներկայացուցիչները ներկա կգտնվեն պատգամավոր Տիգրան Արզաքանցյանի` «Երկիր» օրաթերթի դեմ ներկայացված հայցի քննությանն ու «Գլենդեյլ Հիլզն» ըննդդեմ «Ժամանակի» դատական պրոցեսին:
Կազմակերպության հայտարարությունում հստակ նշվում է, որ Հայաստանում պետք է զարգանա մամուլի ինքնակարգավորումը «իսկ նման հայցադիմումների քննության ընթացքում դատարանները պետք է հավատարիմ մնան փոխհատուցման համարժեքության սկզբունքին»:
