Խոսքի ազատության պաշտպանության կոմիտեի նախագահ Աշոտ Մելիքյանը նկատեց, որ ԶԼՄ-ների ինքնակարգավորումն այսօր արդիական է, քանզի լրատվամիջոցների նկատմամբ հայցերի առատության պարագայում լրագրողական համայնքի աջակցությունն է պետք:
«Մամուլի ազատություն» ֆորումի ընթացքում Մելիքյանն անդրադարձավ 2007 թ. ստեղծված ԶԼՄ-ի ինքնակարգավորման դիտորդ մարմնին ու դրա շրջանակներում մշակված լրատվամիջոցների ինքնակարգավորման մասնագիտական վարքականոնին և տեղեկացրեց, որ այսօրվա դրությամբ այն ստորագրել է 41 սուբյեկտ, որոնք ներկայացնում են 44 լրատվամիջոցների:
Խոսելով այսօր լրատվամիջոցների նկատմամբ սկսված դատական արշավների մասին՝ Մելիքյանը նշեց, որ եթե մի կողմ դրվեր այդ գործերի քաղաքական ենթատեքստը և մարդկային վրեժխնդրության մոտիվացիան, ապա էթիկական նորմերի շրջանակում այդ կոնֆլիկտները շատ հեշտ լուծելի կլինեին:
Մելիքյանը խոսեց նաև Հանրային խորհրդի կողմից ընդունված էթիկական սկզբունքների խարիտիայի մասին և նկատեց, որ շատ շտապ 11 հեռուստաընկերություններ գնացին ու ստորագրեցին այն, քանզի դա արվել էր նախագահականի կողմից. «Թեև նշում են, թե դա քաղաքական ատյան չէ, բայց բոլորս գիտենք, որ այն ստեղծվել է ՀՀ նախագահի հրամանագրով և ավելի շատ սպասարկողի դեր է ստանձնել: Դա ևս մեկ անգամ ցույց տվեց, թե ինչ կախյալ վիճակում են գտնվում հեռուստաընկերությունները, և թե ում շահերն են հիմնականում պաշտպանում»:
Ըստ Մելիքյանի՝ այս խարտիան պառակտում ստեղծեց լրագրողական հանրության մեջ, քանզի մի կողմից դիտորդ մարմնի վարքականոնն է, մյուս կողմից` ՀԽ-ի խարտիան, սակայն, ըստ Մելիքյանի, խարտիայում կան կետեր, որոնք չեն բխում լրատվամիջոցների ազատության հիմունքներից: