Ապրիլի կեսին «Առաջին լրատվականը» տեղեկացրել էր, որ ոստիկանության 50-60 քննիչներ սպառնում են դիմում գրել և ազատվել աշխատանքից:
Սա կապված էր այն փաստի հետ, որ ապրիլի 11-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանից Ազգային անվտանգության ծառայության աշխատակիցները «Երևան-Կենտրոն» ՔԿ հիմնարկ են տեղափոխել մի անձի:
Հատուկ քննչական ծառայությունը միջնորդել էր նշված դատարանին որպես խափանման միջոց երկամսյա կալանք կիրառել ոստիկանության քննչական գլխավոր վարչության Հատկապես կարևորագույն գործերով քննության վարչության (ՀԿԳ) ավագ քննիչ, ոստիկանության մայոր Վահան Խանզադյանի նկատմամբ: Խանզադյանը որպես կասկածյալ անցնում է ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի դեմ հարուցված քրեական գործով:
Հիշեցնենք`Վահան Խանզադյանը Մարտի 1-ի գործով կարևոր քննիչներից մեկն է, ով ակտիվ դերակատարություն է ունեցել զոհերի դիազննումների փաստերը և մահվան իրական պատճառները կոծկելու հարցում: Վ.Խանզադյանի կալանավորումը մեծ անհանգստություն և դժգոհություն էր առաջացրել իրավապահ համակարգի ներսում, եւ մասնավորապես 50- 60 քննիչներ սպառնում էին դիմում գրել, ազատվել աշխատանքից: Նրանց դժգհության պատճառը հետևյալն է` «ասում եք` էս արեք, էն արեք, հետո բռնու՞մ եք…»: Իրավիճակը համակարգի ներսում այնքան էր լարվել, որ Ոստիկանության քննչական գլխավոր վարչության պետ Գագիկ Համբարձումյանը խնդրել էր իրեն երկու օր ժամանակ տալ` որպեսզի բանակցություններ վարի Վահան Խանզադյանին ազատ արձակելու ուղղությամբ, սակայն մեր աղբյուրները գրեթե բացառում են նման դեպքերի ընթացքը:
«Առաջին լրատվականի» տեղեկություններով` քննիչները, ըստ ամենայնի ցանկալի արդյունքը չստանալով` այժմ մտադիր են Ոստիկանապետի դեմ բացահայտումներով հանդես գալ, ինչը կարող է պայթյունավտանգ իրավիճակ ստեղծել ողջ ոստիկանական համակարգում:
