Թենիսի «Մեծ սաղավարտ»-ի՝ Ավստրալիայի բաց առաջնության եզրափակիչ՝ Նովակ Ջոկովիչ – Էնդի Մարեյ մենախաղից հետո ATP վարկանիշային աղյուսակի 1-ին և 2-րդ համարներն անդրադարձել են մրցավեճին:
Նշենք, որ այս մրցանակը Ջոկովիչի համար 6-րդն էր «Մեծ սաղավարտ»-ի տվյալ մրցաշարում, իսկ Մարեյը դարձավ պատմության երկրորդ թենիսիստը, ով Ավստրալիայի բաց առաջնության 5 եզրափակիչ է տանուլ տվել:
«Առաջին հերթին ցանկանում եմ իմ հարգանքն արտահայտել Էնդիի նկատմամբ, ով ամբողջ մրցաշարը հրաշալի անցկացրեց և ֆանտաստիկ խաղաց եզրափակիչում: Նա հիասքանչ մարդ է, լավ ընկեր ու իսկական պրոֆեսիոնալ: Վստահ եմ, որ նա դեռ հնարավորություն կունենա այստեղ հաղթելու: Ես ուրախ եմ Էնդիի ու Կիմի համար, ովքեր շուտով ծնողներ են դառնալու: Վայելե´ք պահը. ես արդեն ունեցել եմ նման զգացողություն, երբ իմ կինը՝ Ելենան, ինձ պարգևեց Ստեֆանին: Ձեզ անզուգական պահեր են սպասվում:
Մեծ շնորհակալություն եմ հայտնում մրցաշարի կազմակերպիչներին: Իհարկե սա «Մեծ սաղավարտ»-ի լավագույն մրցաշարն է, և զարմանալի չէ, որ մարդիկ այն կոչում են «երջանիկ սաղավարտ»: Ինձ համար մեծ պատիվ է լինել այնպիսի մեծագույն խաղացողների կողքին, ինչպիսիք Ռոդ Լեյվերն ու Ռոյ Էմերսոնն են: Շնորհակալ եմ պարոն Լեյվերին, որ անձամբ ներկա գտնվեց եզրափակիչին ու այն իր ներկայությամբ դարձրեց ավելի յուրահատուկ: Ցավոք սրտի, պարոն Էմերսոնը հիմա այստեղ չէ, սակայն ես նրան ամենայն բարիք եմ ցանկանում ու քաջառողջություն»,- մասնավորապես ասել է Ջոկովիչը:
«Ինձ թվում է՝ ես արդեն հայտնվել եմ այսպիսի իրավիճակում ավելի վաղ: Ամենից առաջ ցանկանում եմ շնորհավորել Նովակին այստեղ տարած իր 6-րդ հաղթանակի համար: Նա պարզապես ֆանտաստիկ էր նախորդ մրցաշրջանում և նույն կերպ սկսել է նաև այս մրցաշրջանը: Նովակն ու իր աջակիցներն անկրկնելի աշխատանք են կատարում: Ցանկանում եմ նաև շնորհակալություն հայտնել նաև իմ աջակիցներին: Ցավոք սրտի, ես չկարողացա առավելության հասնել, սակայն դուք իմ կողքին եղաք ամբողջ մրցաշարի ընթացքում:
Ուզում եմ շնորհակալություն հայտնել կազմակերպիչներին, ովքեր մրցաշարն ամեն տարի ավելի ու ավելի լավն են դարձնում: Դուք շատ եք օգնում թենիսիստներին: Շնորհակալ եմ նաև երկրպագուներին: Միշտ բարդ է խաղալը, սակայն ձեր անմեկնելի աջակցությունը միշտ առաջ է տանում մեզ: Շնորհակալություն թենիսի Ավստրալիայի լեգենդին, ով հետևում էր մեր մենախաղին: Ֆանտաստիկ էր տեսնել Ձեզ տրիբունայում:
Եվ, իհարկե, ցանկանում եմ հատուկ շնորհակալություն հայտնել կնոջս՝ Կիմին, ով ամբողջ մրցաշարի ընթացքում իրեն դրսևորել է իսկական հերոսուհու պես: Որքան հնարավոր է արագ կնոջս հետ տուն եմ վերադառնալու»,- ասել է Էնդի Մարեյը: