Կենտրոնական բանկի միջազգային պահուստների միջին եկամտաբերությունը նվազել է

ՀՀ ԿԲ 2010 թ. տարեկան հաշվետվության համաձայն, ԿԲ միջազգային պահուստների միջին եկամտաբերությունը և ընդհանուր եկամուտները զգալիորեն նվազել են նախորդ տարվա համեմատ` պայմանավորված տնտեսական և ֆինանսական միջավայրերի փոփոխությամբ: Ըստ հրապարակման` պահուստների միջին տարեկան եկամտաբերությունը կազմել է 0.68 տոկոս (նախորդ տարի` 1.61 տոկոս), իսկ ստացված եկամուտը` 12.4 մլն դոլար (նախորդ տարի` 23.4 մլն դոլար):
Մասնավորապես, 2010 թ. ընթացքում միջազգային պահուստները նախորդ տարվա համեմատ նվազել են մոտ 138 մլն դոլարով` տարեվերջին կազմելով 1.86 մլրդ դոլար:
Ոլորտի մասնագետները այս ցուցանիշը պայմանավորում են պահուստների կառավարման քաղաքականության անկատարությամբ և նշում, որ այն վերանայման կարիք ունի: Միջազգային պահուստների միջին եկամտաբերության և ընդհանուր եկամուտների նվազման հիմնական պատճառը, ըստ մասնագետների, այն է, որ մեր պահուստները հիմնականում տեղաբաշխված են Միացյալ Նահանգների շուկայում և մեծ մասը պահվում է ամերիկյան պետական պարտատոմսերում` արտարժույթով, իսկ ամերիկյան շուկայում ճգնաժամի շրջանում վերաֆինանսավորման տոկոսադրույքի կտրուկ նվազումն էլ ուղղակիորեն ազդել է պետական պարտատոմսերի տոկոսների վրա: