Ադրբեջանական Salamnews.org կայքի փոխանցմամբ, հունիսին կայանալու է Ադրբեջանի և Վրաստանի բնապահպանության նախարարների հանդիպումը: Հանդիպման ժամանակ կողմերը քննարկելու են Քուռ գետ լցվող արդյունաբերական թափոնների նվազեցման խնդիրը:
Ադրբեջանի բնապահպանության նախարարության ներկայացուցիչ Մանտանատ Ավազովան նշել է, որ, ամենայն հավանականությամբ, կողմերը կկնքեն մի համաձայնագիր, որը կարգելի արդյունաբերական թափոնների հայտնվելը Քուռ գետում, քանի որ դրա արդյունքում գետի ջուրը վերածվել է բոլոր հնարավոր քիմիական նյութերի «կոկտեյլի»:
Ավազովայի խոսքերով, Քուռ գետի աղտոտման գործում «մեծ ներդրում» ունի նաև Հայաստանը, որն իր հերթին արդյունաբերական թափոնները լցնում է Արաքս գետի մեջ և դրանք առաքում Ադրբեջան` «անտեսելով» միջազգային կազմակերպությունների հորդորները.
«Այս ամենի պատճառով նախագահ Իլհամ Ալիևը հրահանգել է 130 գյուղերում տեղակայել ժամանակակից ջրամաքրիչ սարքեր` Քուռ և Արաքս գետերից բնակչությանը խմելու ջուր մատակարարելու համար: Ներկայումս այդ սարքերը մաքուր ջրով ապահովում են մոտ 300.000 մարդու»:
Նշվում է, որ Ադրբեջանի քաղցրահամ ջրերի պաշարների 70 տոկոսը բաժին է ընկնում Քուռ և Արաքս գետերին:
Հիշեցնենք, որ նախկինում էլ ադրբեջանական կողմը Հայաստանին մեղադրում էր Մեծամորի ատոմակայանի միջուկային թափոններն Արաքս գետը լցնելու մեջ:
