«Այն դատական արշավը, որ սկսվել է լրատվամիջոցների դեմ, չի կարող որևէ դրական զարգացում կանխատեսել: Այս պահին արդեն գոյություն ունեն 12 դատական գործեր, որոնք գերազանցապես հարուցված են ընդդիմադիր լրատվամիջոցների դեմ, ընդ որում, որոշ պարբերականներ միանգամից 2-3 դատական գործերի մեջ են ներգրավված»,- ներկայացնելով զրպարտության և վիրավորանքի մասին օրենքների ապաքրեականացումից հետո ստեղծված իրավիճակը՝ ՄԻՊ գրասենյակի կազմակերպած «Մամուլի ազատություն» ֆորումի ընթացքում կարծիք հայտնեց Տեղեկատվության ազատության կենտրոնի նախագահ Շուշան Դոյդոյանը:
Դոյդոյանը տեղեկացրեց, որ օրերս «Լրագրողներ առանց սահմանի» կազմակերպությունը հայտարարություն է տարածել` խստորեն դատապարտելով Հայաստանում ձևավորված արատավոր դատական պրակտիկան, խիստ մտահոգություն է հայտնվել հարուցված դատական գործերի կապակցությամբ, ինչպես նաև անընդունելի են համարվել տուգանքների այն անհամապատասխան չափերը, որոնք պահանջվում են լրատվամիջոցներից, ինչի արդյունքում պարարտ հող է ստեղծվել ինքնագրաքննության համար:
Շուշան Դոյդոյանը, լինելով նորաստեղծ Տեղեկատվական վեճերի խորհրդի քարտուղար, նշեց, որ այս խորհուրդն ապագայում` իր գործունեության ընթացքում կփորձի կանխել նոր դատական գործերի զարգացումները. «Այս հասարակական մեխանիզմի միջոցով որոշակիորեն դրական ազդեցություն կունենանք դատական որոշումների բովանդակության վրա: Մենք ինքներս էլ գիտակցում ենք, որ իրավունք չունենք միջամտելու արդարադատությանը, բայց հասարակական որոշակի ճնշման արդյունքում դատավորներն իրենց որոշումները կայացնելիս մի քանի անգամ ծարութեթև կանեն»:
