Ըստ երևույթին Ամերիկայի Միացյալ Նահանգների իշխանությունը շատ պինդ է բռնել Հայաստանի իշխանության ոտքից, ու թերևս երկար ժամանակ մտադիր չէ բաց թողնել այն: Փետրվարի 28-ից ի վեր, երբ Հայաստանում ԱՄՆ դեսպան Մարի Յովանովիչը իր հայտնի ելույթն ունեցավ Երևանի պետհամալսարանում, Հայաստանում քաղաքացիական հասարակության և ժողովրդավարության ապագայի մասին, ԱՄՆ ևս մի քանի ակնառու գործողությամբ կարծես թե լրջագույն ահազանգ է հնչեցրել Հայաստանի իշխանության համար: Նախ, դեսպանի ելույթից հետո եղավ նաև ԱՄՆ պետդեպարտամենտի զեկույցը, որտեղ ի թիվս Հայաստանի ժողովրդավարության մասին անբարենպաստ գնահատականների, կար այն, որ Սերժ Սարգսյանը նախագահ է դարձել 2008 թվականին «նշանակալիորեն կեղծված» ընտրության միջոցով:
Հետո ԱՄՆ դեսպան Յովանովիչը կրկին հայտարարեց, որ Հայաստանի ժողովրդավարական վիճակը վատ է, ասելով, որ այդ պատճառով Հայաստանը չի կարող դիմել Հազարամյակի մարտահրավեր կորպորացիայի նոր ծրագրի հասցեատեր դառնալու համար: Եվ ահա մայիսի 3-5-ը Հայաստան է ժամանում Հազարամյակի մարտահրավեր կորպորացիայի գլխավոր գործադիր տնօրեն Դանիել Վ. Յոհաննեսը, որը ստուգելու է Հայաստանում ծրագրի ընթացքը: Կասկած չկա, որ նրա այցը Հայաստանի իշխանության հանդեպ «ռեվիզորության» նպատակ ունի, և ով գիտե, թե Դանիել Վ. Յոհաննեսը ինչ բացահայտումներ կարող է անել Հայաստանում Հազարամյակի մարտահրավեր կորպորացիայի ծրագրի իրականացման գործընթացը, կամ արդյունավետության հարցերի կապակցությամբ: Ավելին, հատկանշական է, որ նա Հայաստան է գալիս ներկայումս, ոչ թե ասենք սեպտեմբերին` ծրագրի ավարտին մոտ:
Դա թերևս ևս մի վկայություն է այն մասին, որ մենք գործ ունենք Հայաստանի իշխանության վրա ԱՄՆ իշխանության բավական աննախադեպ ծավալի ճնշման հետ: Իսկ եթե դրան գումարում ենք նաև մեկ այլ ուշագրավ հանգամանք, կապված օրերս Հայաստան կատարած այցի և այդ ընթացքում Հայ ազգային Կոնգրեսի ղեկավար Լևոն Տեր-Պետրոսյանի հետ ԱՄՆ պետքարտուղարի տեղակալ Թինա Քեյդենաուի հանդիպման հետ, ապա պատկերը կարծես թե առավել ևս խոսուն է դառնում: Բանն այն է, որ հանդիպման մասին Կոնգրեսի հաղորդագրության մեջ նշվում էր, որ Տեր-Պետրոսյան-Քեյդենաու հանդիպմանը խոսք է եղել նաև արտահերթ ընտրությունների անցկացման հնարավորության մասին: Հայ ազգային Կոնգրեսը Տեր-Պետրոսյանի և արտասահմանցի դիվանագետների հետ հանդիպումների բովանդակության մասին հրապարակային հաղորդագրությունների կամ հայտարարությունների հարցում սովորաբար լինում է բավական զգույշ, հետևաբար, եթե Կոնգրեսի հաղորդագրության մեջ խոսք կա արտահերթ ընտրությունների թեմատիկան շոշափելու մասին, ուրեմն ամերիկյան կողմը թերևս ամենևին զգուշավոր չի եղել այդ հարցի հրապարակայնացման առումով:
Այլ կերպ ասած, դա թերևս նույնպես զգայուն մեսիջ է, ուղղված Հայաստանի իշխանությանը: Այդպիսով, կարծես թե նկատելի է, որ ԱՄՆ բավական ինտենսիվացրել է Հայաստանի իշխանության հանդեպ ժողովրդավարության և այսպես ասած արդար կառավարման հետ կապված իր ազդակները: Թե ինչն է այդ ամենի բուն շարժառիթը, դժվար է ասել: Հասկանալի է, որ խնդիրն այստեղ ԱՄՆ քաղաքական շահն է: Հարցն այն է, թե ինչ տեսքով կամ բովանդակությամբ է այն հանդես գալիս: Շատ տարածված է այն կարծիքը, թե դա պայմանավորվում է Ղարաբաղի հարցով: Բայց նույնիսկ այդ դեպքում, եթե իհարկե ենթադրենք, որ իրապես դրանով է պայմանավորված, դժվար է միարժեք ասել` ԱՄՆ Հայաստանի վրա ճնշում է գործադրում ստատուս-քվոն փոխելու, թե պահելու համար: