Թուրքական Cumhuriyet թերթի փոխանցմամբ, մայիսի 1-ին, երբ Թուրքիայում նշվում է աշխատավորների տոնը, անարգվել է Աթաթուրքի հուշարձանը:
Դեպքը տեղի է ունեցել Ստամբուլի Թաքսիմ հրապարակում, ուր մի դիմակավոր երիտասարդ բարձրացել է Աթաթուրքի հուշարձանին և նրա վրա փռել քուրդ առաջնորդ Աբդուլլահ Օջալանի նկարով պաստառը: Մեկ ուրիշն էլ գլխարկ է հագցրել Աթաթուրքի գլխին:
Հիշեցնենք, որ Թուրքիայում ամեն գնով պաշտպանում են երկրի հիմնադիր, «բոլոր թուրքերի հայր» Մուսթաֆա Քեմալին: Ավելին, գոյություն ունի նրա անձի պաշտպանության մասին օրենք:
Աթաթուրքի պաշտպանության մասին թիվ 5816 օրենքն ընդունվել է 1951-ի հուլիսի 25-ին և օրենքի ուժ ձեռք բերել հուլիսի 31-ին։ Այս օրենքի 1-ին հոդվածով Աթաթուրքի հիշատակը վիրավորող անձանց համար նախատեսվում է 1-3 տարվա ազատազրկում: 2-րդ հոդվածով նախատեսվում է այդ պատժաչափի համամասնական ավելացում, եթե հասարակական վայրերում իրենց այդպիսի բան են թույլ տվել երկու կամ ավելի անձինք: 5-րդ հոդվածի համաձայն էլ` այս օրենքի իրագործմամբ պետք է զբաղվի արդարադատության նախարարը: