Այսօր հիմնադրվեց Տեղեկատվական վեճերի խորհուրդը, որի հիմնական նպատակն է պաշտպանել խոսքի ազատությունը, տեղեկատվության մատչելիությունը, ինչպես նաև անձի արժանապավությունը եւ մասնավոր կյանքի իրավունքը` այդ իրավունքների իրացման ընթացքում ծագող դատական վեճերի դեպքերում փորձագիտական եզրակացություններ հրապարակելով, որոնք հիմնված են ՀՀ օրենսդրության, միջազգային իրավական ակտերի եւ էթիկայի նորմերի վրա:
Տեղեկատվաան վեճերի խորհրդի հիմնադիր անդամներ են Տեղեկատվության ազատության կենտրոնի նախագահ Շուշան Դոյդոյանը, Երեւանի մամուլի ակումբի նախագահ Բորիս Նավասարդյանը, «Առավոտ» օրաթերթի գլխավոր խմբագիր Արամ Աբրահամյանը, «Արնի Քընսալթ» փաստաբանական գրասենյակի փոխտնօրեն Արա Ղազարյանը եւ «Արմմեդիա» ծրագրի տնօրեն Մանանա Ասլամազյանը:
Նշենք, որ տեղեկատվական վեճերի խորհուրդը ստեղծվել է ՀՀ մարդու իրավունքների պաշտպանի նախաձեռնությամբ: ՄԻՊ գրասենյակի կազմակերպած «Մամուլի ազատություն» երկօրյա ֆորումի ընթացքում, ներկայացնելով խորհրդի գործունեությունը, ՀՀ օմբուդսեն Կարեն Անդրասյանը նկատեց, որ խորհրդի հինգ անդամներն էլ հեղինակություն են վայելում լրագրողական և իրավաբանական շրջանակներում, ինչն էլ լրագրողներին թույլ կտա ապահովված եւ պաշտպնված զգալ իրենց: