«Շատերն ինձ համար ցավալի թեմա են փորձում դարձնել իմ նախաձեռնությունը ապաքրեականացնել զրպարտության և վիրավորանքի մասին հոդվածները: Ես ինքս հասկանում եմ բոլորի մտահոգությունները, բայց դրանք ի սկզբանե եղել է ոչ միայն պաշտպանել խոսքի ազատությունը, այլլ նաև մարդու արժանապատվությունը, մասնավոր կյանքը, ճիշտ այնպես, ինչպես արժանի է պաշտպանության խոսքի ազատությունը»,- ՄԻՊ գրասենյակի կազմակերպած «Մամուլի ազատություն» ֆորումի ընթացքում հայտարարեց ՀՀ նորանշանակ օմբուդսմեն Կարեն Անդրեասյանը:
Նա նաև նշեց, որ հայաստանյան մամուլում առկա ստահոդ, ագրեսիվ, պատվերով, հասարակությանն ու մեր պետության ժողովրդավարությանը ոչ օգտակար հոդվածները չեն նպաստում խոսքի ազատությանը և ոչ ոք չի կարող արդարացնել զրպարտությունը կամ վիրավորանքը:
ԵԱՀԿ երևանյան գրասենյակի ղեկավար, դեսպան Սերգեյ Կապինոսը նշեց, որ զրպարտության և վիրավորանքի մասին օրենքների ապաքրեականացումը լուրջ քայլ է, սակայն այն այժմ առաջացրել է ԶԼՄ-ի համար լուրջ ֆինանսական խնդիրներ և հարցականի տակ դրել լրատվամիջոցների գոյությունը. «Չափազանց մտահոգիչ են լրատվամիջոցների նկատմամբ հարձակումների հաճախակիացումը և զրպարտության և վիրավորանքի վերաբերյալ գործերում անհրաժեշտ է սահմանել դրամական փոխհատուցման հստակ շեմ: Հուսով ենք, որ քաղաքացիական օրենսգիրքը կվերանայվի և այդ հստակ շեմը կհաստատվի»:
Հայաստանում ԱՄՆ դեսպան Մարի Յովանովիչը ևս նկատեց, որ զրպարտության և վիրավորանքի մասին օրենքների ապաքրեականացումը կարևոր է, սակայն պետք է ձեռնարկվեն համապատասխան միջոցներ, կարգավորվեն դատական համակարգի գործունեությունը, որպեսզի ապաքրեականացված օրենքում նշված դրամական տույժերը չսպառնան լրատվամիջոցների գոյությանը:
