Թուրքական Zaman թերթի փոխանցմամբ, Genar հետազոտական կենտրոնը հունիսի 12-ին կայանալիք խորհրդարանական ընտրությունների կապակցությամբ ապրիլի 13-27-ը հարցախույզ է անցկացրել Թուրքիայի 81 նահանգներից 60-ում: Դրան մասնակցել է 2.250 մարդ, որոնք պատասխանել են` «Եթե այժմ խորհրդարանական ընտրություններ լինեին, ո՞ր կուսակցության օգտին կտայիք ձեր քվեն» հարցին:
Մասնակիցների 48.7 տոկոսը նշել է վարչապետ Էրդողանի գլխավորած «Արդարություն և զարգացում» կուսակցությունը (ԱԶԿ), 25.2 տոկոսը` քեմալական ուղղությունը ներկայացնող Ժողովրդա-հանրապետական կուսակցությունը (ԺՀԿ), 11.9 տոկոսը` «Ազգայնական շարժում» կուսակցությանը (ԱՇԿ), իսկ 6.4 տոկոսը` քրդական «Խաղաղություն ու ժողովրդավարություն» (ԽԺԿ)կուսակցության անկախ թեկնածուներին: Մյուս կուսակցությունները միասին հավաքել են 7.4 տոկոսը:
Միաժամանակ նշվել է կուսակցությունների առավելագույն պոտենցիալը: Օրինակ` ԱԶԿ-ն առավելագույնը կարող է ստանալ քվեների 57.6 տոկոսը, ԺՀԿ-ն` 36.7 տոկոսը, ԱՇԿ-ն` 28.3 տոկոսը, ԽԺԿ-ն` 9.6 տոկոսը:
Հիշեցնենք, որ Genar-ը այս տարվա հունվարին անցկացրել էր նույնատիպ հարցախույզ, որից ստացվել էր հետևյալ պատկերը. ԱԶԿ` 46.4 տոկոս, ԺՀԿ` 24.3 տոկոս, ԱՇԿ` 13.4 տոկոս, ԽԺԿ` 5.2 տոկոս: