Այսօր Ռուսաստանի Դաշնության նախագահ Դմիտրի Մեդվեդևը երկրի խորհրդարան է ուղարկել քրեակատարողական օրենսգրքում փոփոխություններ իրականացնելու վերաբերյալ նախագիծը: Մեդվեդևն այս փոփոխություններով նախատեսում է առավելագույնս «բարդացնել ահաբեկիչների և ծայրահեղականների կյանքը»:
Եթե օրենքի գործող տարբերակում նշված է, որ դատապարտված ահաբեկիչները պատիժը պետք է կրեն իրենց բնակավայրերին մոտ, ապա այս փոփոխություններով նախատեսվում է ահաբեկիչներին ուղարկել ՌԴ ցանկացած ռեգիոն, հաղորդում է RIA-Novosti-ն:
Ըստ նախագահի` սա թույլ կտա խուսափել ահաբեկիչների` քրեակատարողական մեկ հիմնարկում կուտակվելու վտանգից: Բացի այդ, առավել վտանգավոր հանցագործություններ կատարողներն այսուհետ կարող են տեղափոխվել քրեակատարողական մեկ հիմնարկից մյուսը, ինչը գործող օրենքով արգելված է. նրանք պետք է լրիվ պատժաչափը կրեն մեկ քրեակատարողական հիմնարկում:
Փորձագետներն ասում են, որ օրենսդրական այս փոփոխությունները պայմանավորված են ահաբեկչության դեմ պայքարի առավել արդյունավետ միջոցների քննարկմամբ: