Թեպետ նավթի գները աշխարհաքաղաքական իրադարձությունների վրա ազդող միակ որոշիչ գործոնը չեն, սակայն անվերապահորեն կարելի է ասել, որ եթե նավթի գները լուրջ անկում արձանագրեն, ապա անպայման դրան կհետևեն մեծամասշտաբ ցնցումները: Դա են վկայում վերջին չորս տասնամյակում նավթի գների տատանումներով պայմանավորված միջազգային հարաբերությունները և քաղաքական իրադարձությունները: Այս մասին ասված է Guardian-ի խմբագրականում:
Այսօր կարելի է վստահաբար ասել, որ նավթի գների նվազումը թուլացրեց զարգացող երկրների՝ տնտեսական աճի և կայուն երկիր դառնալու հույսերը: Այժմ նրանք հայտնվել են վտանգավոր անորոշության մեջ: Օրինակ՝ Բրազիլիան, որի տնտեսությունը այսօր ցնցման մեջ է, կամ Նիգերիան, որը համարվում է Աֆրիկայի նավթարդյունահանող երկրների առաջատարը, այսօր անկայուն վիճակում են հայտնվել:
Նավթի գների նվազումը անկայունություն է արձանագրում նաև Ռուսաստանում: Վերջերս Ռուսաստանը հայտարարեց պետական ծախսերի 10% կրճատման մասին, և դա ակնհայտորեն բխում է նավթի գնանկումից, որովհետև Ռուսաստանի տնտեսությունը կառուցված է մեկ բարելի համար 100 դոլարի հաշվարկով:
Սակայն նավթի գնանկման աշխարհաքաղաքական հետևանքները ամենասուրը զգացվում են Մերձավոր Արևելքում, և այնտեղ դրանք անկանխատեսելի են: Սաուդյան Արաբիայի համար դա կարևոր առիթ է Իրանի նշանակությունը տարածաշրջանում թուլացնելու համար, որը պատրաստվում է պատժամիջոցների վերացումից հետո վերադառնալ նավթի արտահանման շուկա: Սակայն նավթի գների նվազումը վտանգավոր է նաև Պարսից ծոցի դինաստիայի համար, որը կհանգեցնի ներքին խնդիրներից ուշադրությունը շեղելու համար բռնատիրական իշխանությունների կողմից տարածաշրջանային պատերազմների հրահրման:
Այսպիսով, կարելի է ընդհանրացնել, որ չափից դուրս շատ նավթային եկամուտները նույնքան կործանարար են, որքան դրանց չափից ավելի նվազումը:
