CNN TÜRK-ի եթերում թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն, պատասխանելով լրագրողների հարցերին, անդրադարձ է կատարել նաև իր հայկական արմատների մասին շրջանառության մեջ դրված լուրերին.
«Հայ լինելն ամոթ չէ, սակայն ես հայ չեմ: Իմ մայրը հայ չէ: Այսուհետ ես լուրջ պայքար եմ մղելու մամուլում այդ մասին հրապարակումների դեմ»:
Հիշեցնենք, որ այս տարվա հունվարին թուրքական շուկայում հայտնվեց «Դերսիմցի հայ Եմուշ խանումի որդի ինժեներ Քեմալը» խորագրով գիրքը, որում պատմվում էր ԺՀԿ ներկայիս նախագահ Քեմալ Քըլըչդարօղլուի հայկական (մորական կողմից) արմատների մասին:
Ուշագրավն այն է, որ դրանից հետո թուրքական
Hürriyet թերթը գրեց.
1. Մինչ օրս Թուրքիայում չի եղել մի պաշտոնյա կամ առաջնորդ, ով քաջություն ունենար, ի պատասխան «դու հայ ես» արտահայտության, ասեր` «այո, ես հայ եմ… ասածդ ի՞նչ է»:
2. Հայ կամ հրեա լինելու մեջ մեղադրվողները համարում են, թե դա իրենց հասցեին արված վիրավորանք է և իսկույն վկայակոչում են իրենց տոհմածառն ու արմատները:
3. Հանրության մի ստվար հատված խրախուսում է բոլոր նրանց, ովքեր հայկական կամ հրեական ծագում ունենալու հանգամանքը համարում են մեղսագործություն: