Թուրքական Hürriyet թերթի փոխանցմամբ, երեկ Թուրքիայի արտգործնախարար Ահմեդ Դավութօղլուն հունիսի 12-ին կայանալիք խորհրդարանական ընտրությունների նախապատրաստական աշխատանքներին հետևելու նպատակով ժամանել է Քենիա, սակայն շուտով ստիպված է եղել կիսատ թողնել այդ այցն ու անհապաղ վերադառնալ Անկարա:
Պատճառն այն է, որ երեկ Սիրիայում տեղի ունեցած «Ցասման օր» բողոքի ակցիայից հետո` ուշ երեկոյան, Հաթայի նահանգում (Ալեքսանդրետի սանջակ) թուրք-սիրիական սահմանը հատելու փորձ են ձեռնարկել Սիրիայի 234 քաղաքացիներ:
Նրանց թվում եղել են նաև կանայք ու երեխաներ: Գաղթականները «զինված» են եղել թուրքական դրոշներով և սահմանը հատելիս վանկարկել են. «Մենք ցանկանում ենք ապրել թուրքերի նման», «Ժողովրդավարություն ենք ցանկանում», «Մենք ցանկանում ենք, որ վարչապետ Էրդողանը մեզ տեր կանգնի»:
Այս կապակցությամբ Դավութօղլուն տեղական ժամանակով 21.30-ին հրատապ նիստ է գումարել, որը ժամեր է տևել: Այն նախագահել է հենց Դավութօղլուն: Նիստին մասնակցել են նաև ներքին գործերի նախարար Օսման Գյունեշը, Գլխավոր շտաբի պետի տեղակալ, բանակի գեներալ Ասլան Գյուները, Ազգային հետախուզական կազմակերպության (MIT) նախագահ Հաքան Ֆիդանը, վարչապետի տեղակալ էֆքան Ալան և արտգործնախարարի առաջին տեղակալ Ֆերիդուն Սինիրլիօղլուն:
Նրանք քննարկել են սիրիական վերջին զարգացումները` կարևորություն տալով սիրիական գաղթականների մեծ ներհոսքի դեմն առնելու միջոցառումներին:
Նշվում է, որ նախորդ օրը MIT-ի նախագահ Հաքան Ֆիդանը Էրդողանի հատուկ բանագնացի կարգավիճակով մեկնել էր Դամասկոս և հանդիպել նախագահ Բաշար Ալ-Ասադի հետ: Ֆիդանն Ասադին խորհուրդ էր տվել բարեփոխումներ իրականացնել:
Պլանավորված է հաջորդ շաբաթ ևս մեկ թուրքական պատվիրակություն գործուղել Դամասկոս:
Հիշեցնենք, որ երեկ էլ Թուրքիայի նախագահ Աբդուլլահ Գյուլի նախագահությամբ Չանքայա նախագահական նստավայրում կայացել է Ազգային անվտանգության խորհրդի (ԱԱԽ) նիստը: 6.5 ժամ տևած այդ նիստը դարձյալ նվիրված է եղել Սիրիայում տիրող իրավիճակին:
