2011 թ. մարտի 2-ին Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը քաղաքացիական հայցով`ընդդեմ ՀՀ ոստիկանության Շիրակի մարզային վարչության դիմել էր ՀՀ Վարչական դատարան: Հայցապահանջը 2011 թվի փետրվարի 17-ին Գյումրիի Սայաթ-Նովա փողոցում ոստիկանության աշխատակիցների կողմից ազատ տեղաշարժման սահմանադրական իրավունքի խախտման փաստի ճանաչումն է:
Լևոն Բարսեղյանի հայցադիմումը մերժվել է 7-էջանոց բացատրությամբ, համաձայն որի` նախաքննության արդյունքում պարզվել է, որ հանցակազմ չկա և քրեական գործ չի հարուցվելու:
«Առաջին լրատվականի» հետ զրույցում Լ. Բարսեղյանը նշեց, որ ինքն ակնկալում էր, որ քրեական գործ կհարուցվի և հետաքննություն կանցկացվի. «Մի քանի անգամ բացատրություն եմ գրել ոստիկանությունում, ապացույցներ և վկաներ եմ ներկայացրել»:
Բարսեղյանը պատրաստվում է բողոքարկել որոշումը և պահանջելու է քրեական գործ հարուցել, և եթե այս անգամ էլ նրա ակնկալիքները չիրականանան, դիմելու է դատարան և դատարանի միջոցով պահանջելու է վերացնել քրեական գործ չհարուցելու մասին որոշումը:
Բարսեղյանը նշեց, որ իր տրամադրած տեսանյութերն ու մյուս ապացույցները չեն ուսումնասիրվել, այլ հիմնվել են ոստիկանների խոսքերի վրա. «Ինչը սպասելի էր: Ռեժիմը պաշտպանում է ռեժիմին` շունը շան միս չի ուտում»: