Անցած տարվա իրադարձությունների մեծ մասը անսպասելի էին վերլուծաբանների համար, նշանակում է՝ չարժե հուսալ, որ 2016թ. իրավիճակն աշխարհում հաջորդաբար և տրամաբանորեն կզարգանա: Այս մասին գրում է Financial times-ը:
Ըստ հոդվածագրի՝ առաջին հերթին անակնկալներ պետք է սպասել Չինաստանից, որը վերջին քառորդ դարում հռչակվել է չափազանց բուռն տնտեսությամբ և նույնքան ձանձրալի քաղաքականությամբ: Այս տարի նախագահ Սի Ցզինպինի սկսած կոռուպցիայի դեմ պայքարի արշավի շնորհիվ ներքին իրավիճակը երկրում կարող է փոխվել: Իշխանությունից հեռացվում են առավել ազդեցիկ և հարուստ մարդիկ, ընդ որում՝ այդ ամենը տեղի է ունենում տնտեսական անկման ֆոնին: Ու թեև կողքից Չինաստանի պաշտոնական քաղաքականությունը լիովին հանգիստ է թվում՝ իշխանությունների դեմ պայքարի հավանականությունն աճում է, այնպես որ՝ Չինաստանի ղեկավարի դիրքը կարող է վտանգվել:
Այս տարի մեծ ցնցում է սպասվում Եվրոպային, եթե Բրիտանիան քվեարկի ԵՄ-ից դուրս գալու օգտին: Ներկայումս ԵՄ-ի գաղափարը բավական ոչ ժողովրդական է: ԵՄ-ն տնտեսական դժվարություններ ունի, այն քաղաքականապես պառակտված է, քանի որ երկրները ոչ մի կերպ չեն կարողանում պայմանավորվել փախստականների խնդրի լուծման միասնական ռազմավարության հարցում: Ստեղծված իրավիճակն ակնհայտորեն նպաստավոր հող չի ստեղծում բրիտանական հանրաքվեի համար՝ նշում է պարբերականը:
Ինչ վերաբերում է ԱՄՆ նախագահի ընտրություններին՝ այստեղ վերլուծաբաններն ակնկալում են հաջորդականություն և օրինաչափություն՝ բացառելով Դոնալդ Թրամփի հաղթանակի հավանականությունը: Սակայն այդպիսի գնահատականները հաշվի չեն առնում այն փաստը, որ Թրամփի առաջխաղացումն ԱՄՆ-ում որոշակի հիմնարար փոփոխությունների նշան է: Հարցման արդյունքներով՝ նա է հանրապետականների ֆավորիտը թեկնածուի դերում, իսկ դա, ըստ հոդվածագրի, ինքնին քաղաքական ցնցում կլիներ:
Այս տարվա դրական անակնկալների շարքին պարբերականը դասում է հավանականությունը, որ առաջիկա 12 ամիսներին ԴԱԻՇ-ը լուրջ ռազմական անհաջողությունների կմատնվի: Ըստ ամենայնի, դա կլինի Իրաքում և Սիրիայում, և բացառված չէ, որ այդ գործընթացը տարածվի առաջ՝ Լիբիա և Հյուսիսային Աֆրիկա: Բայց միևնույն ժամանակ՝ եթե ԴԱԻՇ-ը զրկվի իր կենտրոնական տարածքի մասերից, ավելի շատ խթան կունենա Եվրոպայում ահաբեկչությունների տեսքով պատասխան հարվածներ հասցնելու՝ եզրափակում է պարբերականը:
