Թուրքական Zaman թերթի փոխանցմամբ, երեկ երեկոյան Չանքայա նախագահական նստավայրում տեղի է ունեցել Թուրքիայի Ազգային անվտանգության խորհրդի (ԱԱԽ, MGK) նիստը, որը նախագահել է երկրի նախագահ Աբդուլլահ Գյուլը: 6.5 ժամ տևած ԱԱԽ նիստում քննարկվել են թե՛ ներքաղաքական, թե՛ արտաքին քաղաքական զարգացումներ:
Մասնավորապես, ԱԱԽ նիստի ուշադրության կենտրոնում է եղել սիրիական հարցը: ԱԱԽ-ն սիրիական իշխանություններին կոչ է արել անհապաղ բարեփոխումներ իրականացնել, որոնք ուղղված կլինեն սիրիական ժողովրդի քաղաքական, սոցիալական ու տնտեսական օրինական պահանջների ապահովմանը:
ԱԱԽ-ն նաև ընդգծել է Լիբիայում զինադադարի անհապաղ կնքման կարևորությունը: Այստեղ նույնպես պետք է անցկացվեն քաղաքական փոփոխություններ, որոնք կապահովեն լիբիական ժողովրդի օրինական պահանջները: Կարևորվել է նաև Լիբիային հումանիտար օգնության հատկացման շարունակումը:
ԱԱԽ-ի ուշադրությունից չեն վրիպել նաև իրաքյան վերջին զարգացումները: Այս կապակցությամբ ԱԱԽ-ն նշել է, որ Իրաքի խնդիրները կարող են հարթվել միայն ազգային կոնսենսուսի հիման վրա:
Ներքաղաքական խնդիրներից ԱԱԽ-ն քննարկել է հունիսի 12-ին կայանալիք խորհրդարանական ընտրությունների անվտանգության ապահովման խնդիրը: Դա մասնավորապես վերաբերում է երկրի հարավարևելյան շրջաններին, ուր սովորաբար ակտիվ գործունեություն է ծավալում «Քրդստանի աշխատավորական» կուսակցությունը (PKK):
Հիշեցնենք, որ թուրքական իշխանությունները մեծապես անհանգստացած են այն պատճառով, որ Սիրիայի նախագահ Բաշար Ասադի հրաժարականի դեպքում տեղի քրդերը կարող են միավորվել Թուրքիայի, Իրաքի ու Իրանի քրդերի հետ և առաջ քաշել միացյալ պետության պահանջ: Բացի այդ, թուրքական իշխանությունները կանխիչ միջոցառումներ են ձեռնարկել Սիրիայից գաղթականների մեծ ալիքի դեմն առնելու համար: