Այսօր Մարդու իրավունքների պաշտպանի գրասենյակի լրատվության հետ կապերի վարչության պետ Շաքե Ավոյանը մեզ հետ զրույցում տեղեկացրեց, որ մինչ օրս Մարդու իրավունքների պաշտպան Կարեն Անդրեասյանի կողմից բողոքը քննարկման ընդունելու որոշում է կայացվել 104 գործի դեպքում: Բողոքը չքննարկելու որոշում է կայացվել շուրջ 70 գործի դեպքում, քանի որ դրանք այն գործերն են, որոնք Մարդու իրավունքների պաշտպանի լիազորությունների շրջանակից դուրս են: Այսինքն` գործը գտնվում է դատարանում:
Շաքե Ավոյանի խոսքերով, պաշտպանը քննության է վերցնում այն գործերը, որոնք բողոքներ են պետական և տեղական ինքնակառավարման մարմինների գործողություններից: Իսկ եթե մարդը իր հարևանից բողոքի, պաշտպանը չի կարող այն քննարկման վերցնել:
Սակայն այս դեպքում Մարդու իրավունքների պաշտպանության գրասենյակում բողոքողին իր իրավունքներն են բացատրվում և ուղղորդում, թե որ ճանապարհով այն պետք է պաշտպանի:
