Վրացական Apsny.ge կայքի փոխանցմամբ, վրաց լեյբորիստները քննադատել են նախագահ Միխեիլ Սաակաշվիլիին` գյուղացիներին չֆինանսավորելու և շարունակ «անիմաստ ճանապարհորդություններ» իրականացնելու համար: Այս մասին հայտարարել է կուսակցության գործադիր քարտուղար Պաատա Ջիբլաձեն:
Նշվում է, որ օրեր առաջ Սաակաշվիլին հանդիպել էր կախեթցի գյուղացիների հետ և հայտարարել, որ երկրում անմշակ հող ընդհանրապես չպետք է մնա:
Այս կապակցությամբ Ջիբլաձեն հայտարարել է, որ երկրում հողերի անմշակ մնալու պատճառը պայմանավորված է ոչ թե գյուղացիների ծուլությամբ, այլ` վառելիքի բարձր գներով: Վերջին շրջանում բավական բարձրացել է դիզելի գինը, և ֆինանսական ճգնաժամի պատճառով գյուղացիները զրկված են այն գնելու հնարավորությունից.
«Մենք Միխեիլ Սաակաշվիլիին կոչ ենք անում կատարել առավել վաղ մեր հնչեցրած պահանջները և հրաժարվել ոչինչ չարժեցող շրջագայություններից: Տնտեսված գումարներով Սաակաշվիլին կարող է վառելիք գնել և այն հատկացնել գյուղացիներին»:
Հիշեցնենք, որ վերջին շրջանում Վրաստանում վառելիքի շարունակ թանկացումներն առաջացրել են հասարակական կազմակերպությունների խոր դժգոհությունը: Նրանք գտնում են, որ այդ թանկացումներն արհեստական են, և որ իրականում վառելիքի գինը պետք է ներկայիս գնից 20 տոկոսով ավելի քիչ լիներ:
