«Քվեն ուժ է» ընտրական իրավունքի պաշտպանության շարժումն այսօր լսումներ էր կազմակերպել ՀՀ Ընտրական օրենսգրքի նախագծի վերաբերյալ:
Ուշագրավն այն է, որ «Գոլդեն Փելես» հյուրանոցում ՀՅԴ նախաձեռնած քննարկումներին մասնակցում էին նաև հանրապետականները։ Այնտեղ էին ԱԺ պետաիրավական հարցերի մշտական հանձնաժողովի նախագահ, ՀՀԿ-ական Դավիթ Հարութունյանը,ԿԸՀ նախագահ Գարեգին Ազարյանը և նրա տեղակալ Աբրահամ Բախչագուլյանը: Միջոցառման սկսվելուց կարճ ժամանակ անց Ազարյանն ու Բախչագուլյանը դուրս եկան դահլիճից և երկար ժամանակ նստած զրուցում էին հյուրանոցի սրճարանում:
ԱԺ ՀՅԴ խմբակցության ղեկավար Վահան Հովհաննիսյանը իր ելույթում ասաց, որ նժարին երկու խնդիր է դրված: «Ո՞ր իրավունքն է կարևոր` մարդու՝ ընտրության ներկայանալու գաղտնիության իրավունքը, թե՞ ժողովրդի՝ ընտրական ճանապարհով իշխանությունը փոխելու իրավունքը»: Վահան Հովհաննիսյանի խոսքերով, բնականաբար, կարևորը երկրորդ իրավունքն է: Վահան Հովհաննիսյանն այսպես հիմնավորեց ՀՅԴ առաջարկը, թե հարկավոր է հրապարակել քվեարկության օրը ստորագրված ընտրացուցակները, որպեսզի հնարավոր լինի կանխել մահացած կամ երկրից բացակայող անձանց փոխարեն քվեարկությունը:
