«Մեծն Տիգրան» խմբի ռազմական խորհրդի փոխնախագահ, ազատամարտիկ Վլադիմիր Առաքելյանը «Առաջին լրատվական»-ի հետ զրույցում գնահատելով անցնող՝ 2015 թվականը՝ չկարողացավ հիշել որևէ ակնհայտ ձեռքբերում, որն ունեցել է Հայաստան աշխարհը:
Գնահատելով ընդդիմության գործունեությունը՝ Վլադիմիր Առաքելյանն ասաց. «Ես կուզենայի, որ ընդդիմությունը լիներ իսկական ընդդիմություն, ոչ թե ինչ-որ մեկի կողմից ուղղորդված: Մինչդեռ մեր ընդդիմությունը չկարողացավ իրար հետ ընդհանուր լեզու գտնել, մասնավորապես՝ սահմանադրական հանրաքվեի հարցում»:
Ազատամարտիկի խոսքով՝ «մեր ազգը լիդերացավ ունի, ամեն մեկն ուզում է ինքը լինել լիդեր, էլ չգիտեն, որ ժողովրդին առաջնորդելը հանաքմասխարություն չէ: Հիմա էլ է ընդդիմությունը «խաղեր տալիս», ու չենք հասկանում՝ ով է ճիշտ, ով՝ սխալ»:
Ազատամարտիկ Վլադիմիր Առաքելյանին հատկապես ցավ է պատճառել այն, որ հանրաքվեի լցոնումներին մասնակցել է նաև երիտասարդությունը. «Ես էդ ընտրակեղծարար ուսուցիչներին հայ չեմ համարում»:
Մեր զրուցակիցը հայտնեց, որ որպես հանցավոր խմբի անդամներ ձերբակալվել են նաև 1-2 ազատամարտիկներ: «էս ի՞նչ ա, 37 թի՞վն ա հետ եկել»,- ասաց նա՝ իշխանությանը սթափության կոչ անելով:
