Եվրոպական Միության ընդլայնման և եվրոպական հարևանության քաղաքականության հարցերով հանձնակատար Շտեֆան Ֆյուլեն այսօր ՀՀ ԱԳՆ-ում արտգործնախարար Էդվարդ Նալբանդյանի հետ հանդիպումից հետո հրավիրված ասուլիսում անդրադարձավ 2008 թ. մարտի 1-ի դեպքերի թեմային` պատասխանելով «Առաջին լրատվական»-ի հարցին:
Անցյալ տարվա դեկտեմբերին «Ազատություն» ռ/կ-ին տված հարցազրույցում կարևորելով 2008 թ. մարտի 1-ի դեպքերի բացահայտումը՝ նա նշել էր, որ պետք է «առաջ գնալ, ազատ արձակել նրանց, ովքեր դեռ անազատության մեջ են մարտիմեկյան իրադարձությունների առնչությամբ»։
«Առաջին լրատվականը», հիշեցնելով վերոհիշյալ հարցազրույցը, նաև պարոն Ֆյուլեի հետևյալ դիտարկումը` «Հայաստանում կան քաղաքական գործիչներ, որոնք միայն խոսում են, մինչդեռ անհրաժեշտ է, որ մենք նաև նրանց գործը տեսնենք», պարոն Ֆյուլեին հարց ուղղեց` ի՞նչ է փոխվել այս ընթացքում՝ Հայաստանում դեռ քաղբանտարկյալներ կան, և ո՞ր քաղաքական գործիչներին էր նկատի ունեցել պարոն Ֆյուլեն։
«Մոտեցումներից մեկը այս հարցին կարող է լինել իմ առաջին այցի և իմ այս այցի կտրվածքով: Առաջընթաց այդ իմաստով կա, երբ խոսում ենք նրանց մասին, ովքեր ազատազրկվել էին 2008 թ. մարտի իրադարձությունների հետ ուղղակիորեն կապված հանգամանքներում: Բայց իրավիճակը շատ ավելի գլոբալ է, շատ ավելի լայն է, և այն պետք է որպես այդպիսին ընկալեն նաև այստեղ` Հայաստանի քաղաքական գործիչները: Ձեր առաջ քաշած հարցը չափազանց կարևոր է, կարևոր է նաև, որ անցել է երեք տարի, և Հայաստանի քաղաքացիները պետք է լիարժեք պատկերացում ստանան, թե ինչ է տեղի ունեցել, և ով է պատասխանատու 2008 թ. մարտի իրադարձությունների համար: Այժմ քննություն է իրականացվում, և ես բավականությամբ ի գիտություն ընդունեցի նախագահի հայտարարությունը, որն արվել է մեկ-երկու օր առաջ` մարտի 1-ի քննության վերաբերյալ: Կարևոր է նաև, որ ԵԱՀԿ/ԺՀՄԻԳ-ի նախորդ տարվա առաջարկությունները, հանձնարարականները իրագործվեն, և կոնկերտ քայլեր ձեռնարկվեն հետամուտ լինելու համար դրանց իրականացմանը:
Եվ հաջորդը` ես արդեն խոսեցի մոտալուտ`2012-ի ընտրությունների մասին, և անձամբ ես կարծում եմ, որ եթե լիարժեքորեն չխորհենք 2008 թ. իրադարձությունների շուրջ, եթե ամբողջական գնահատական չտրվի 2008 թ. իրադարձություններին, եթե պատմության այդ էջը չփակվի` ավելի դժվար կլինի նպաստավոր միջավայր ստեղծել հասարակության համար` 2012 թ. ընտրությունների անցկացման առումով»,- հայտարարեց Շտեֆան Ֆյուլեն: