Լարի Քինգը վերադառնում է CNN, սակայն այս անգամ նա թոք-շոուներ չի վարելու, այլ ներկայացնելու է հատուկ ծրագիր՝ «Անհավանական. Ալցհայմերի համաճարակը» հաղորդումը: Այն եթեր է հեռարձակվելու մայիսի 1-ին: Այս մասին տեղեկացնում է Associated Press գործակալությունը:
Հաղորդման մասնակցելու է ԱՄՆ 40-րդ նախագահ Ռոնալդ Ռեյգանի որդին` 52-ամյա Ռոն Ռեյգանը: Նրա ընտրությունը պատահական չէ, քանի որ ԱՄՆ նախկին նախագահը տառապում էր այս հիվանդությամբ: Նրանք միասին մեկնելու են Լաս Վեգասի հիվանդանոց, որը մասնագիտացած է Ալցհայմերի հիվանդության բուժման մեջ: Նրանցից մեկն անցել է ստուգում, սակայն դա գաղտնի է պահվում` ապահովելու համար ինտրիգը:
Լարի Քինգը նաև նշել է, որ պատրաստվում է CNN-ի համար պատրաստել առնվազն երկու հաղորդում, որը նվիրված կլինի մասնավորապես բեյսբոլին: Նա խոստովանել է, որ ինքը կարոտում է ամենօրյա եթերները, որ ունենում էր ամերիկյան հեռուստատեսությամբ, և կցանկանար լուսաբանել այնպիսի իրադարձություններ, ինչպիսիք են մասնավորապես Ճապոնիայի և Եգիպտոսի դեպքերը, սակայն չի կարոտում «Քարդաշյան ընտանիքին»:
