Վրացական Apsny.ge կայքի փոխանցմամբ, Վրաստանի կառավարությունը երեկ դիտարկել է «Օտարազգիների իրավական դրության մասին» օրենքում փոփոխություններ մտցնելու խնդիրը, ըստ որի, մի շարք երկրների քաղաքացիներ կարող են Վրաստան ժամանել առանց անցագրի:
Խոսքը մասնավորապես գնում է Ալբանիայի, Սերբիայի, Բոսնիա-Հերցեգովինայի, Մոնտենեգրոյի և Իրաքի քաղաքացիների մասին, որոնք ներկայումս Վրաստան այցելելիս բախվում են անցագրային ռեժիմի խնդրին:
Վրացական կառավարության կարծիքով` անցագրային ռեժիմի վերացումը հնարավորություն կընձեռի այդ երկրների հետ առավել ինտենսիվ տնտեսական ու մշակութային կապեր հաստատելու համար: Բացի այդ, դա կնպաստի Վրաստանի զբոսաշրջային ոլորտի զարգացմանն ու օտար ներդրումների աճին:
Իսկ ինչ վերաբերում է նրան, թե ինչո՞ւ հենց այդ երկրներն են հայտնվել վրացական կառավարության ուշադրության կենտրոնում, ապա այդ կապակցությամբ նշվում է, որ Ալբանիան, Բոսնիա-Հերցեգովինան,Մոնտենեգրոն և Սերբիան հանդիսանում են ԵՄ-ի անդամակցության թեկնածու երկրներ, Ալբանիան նաև հանդիսանում է ՆԱՏՕ-ի անդամ, իսկ Բոսնիա-Հերցեգովինան, Սերբիան ու Մոնտենեգրոն ստացել են ՆԱՏՕ-ին անդամակցելու գործողությունների պլանը:
Նշվում է, որ օտարազգիների իրավական դրության մասին օրենքում փոփոխություններ իրականացնելու դեպքում վերոնշյալ երկրների քաղաքացիները կարող են առանց անցագրի Վրաստանի տարածքում գտնվել շուրջ 360 օր:
Հիշեցնենք, որ նախորդ տարվա աշնանն էլ Վրաստանն անցագրային ռեժիմը վերացրել էր Հյուսիսային Կովկասում բնակվող Ռուսաստանի քաղաքացիների համար:
