Լեռնային Ղարաբաղի Պաշտպանության բանակի օպերատիվ տվյալների համաձայն, դեկտեմբերի 6-12-ն ընկած ժամանակահատվածում Ղարաբաղի և Ադրբեջանի հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է շուրջ 1400 անգամ, որի ընթացքում, տարբեր տրամաչափի հրաձգային զինատեսակներից, հայ դիրքապահների ուղղությամբ արձակվել է ավելի քան 15 հազար կրակոց:
Հանգստյան օրերը ևս առանց հրադադարի ռեժիմի խախտումների չեն անցել: Շփման գծում հակառակորդի կողմից հրադադարի ռեժիմը խախտվել է շուրջ 280 անգամ, հայ դիրքապահների ուղղությամբ արձակվել է ավելի քան 3 հազար կրակոց:
Ռազմական փորձագետ Արթուր Եղիազարյանը նկատում է՝ վերջին մեկ տարում ադրբեջանական կողմը սկսել է օգտագործել խոշոր տրամաչափի զինատեսակներ:
Ադրբեջանի կողմից հրադադարի ռեժիմի հաճախակի խախտումների պատճառներն ըստ քաղաքագետ Սերգեյ Մինասյանի շատ են: Դրանց թվում մասնագետն առանձնացնում է Սարգսյան-Ալիև սպասվելիք հանդիպումը՝ որին ընդառաջ Ադրբեջանը ցանկանում է ստեղծել մի պատկեր, որտեղ Ղարաբաղյան խնդրի խաղաղ լուծման ճանապարհը մտնում է փակուղի, ինչպես նաև Ռուսաստանի պատժամիջոցների կիրառումը Թուրքիայի նկատմամբ, որոնց հետևանքով Թուրքիան Ադրբեջանի միջոցով սրում է իրավիճակը սահմանում: Միևնույն ժամանակ, ըստ քաղաքագետի, սրելով սահմանային իրավիճակն Ադրբեջանի իշխանությունները ցանկանում են շեղել միջազգային հանրության ուշադրությունը ներքաղաքական խնդիրներից:
Այս ամենն ըստ քաղաքագետի ավելացնում է լայնամասշտաբ ռազմական գործողությունների վտանգը, սակայն միևնույն ժամանակ Ադրբեջանը չի կորցնի զգոնությունը, և չի հատի կարմիր գիծը՝ հասկանալով, որ ռազմական գործողությունները վտանգում են նաև ադրբեջանական ռեժիմի կայունությունը:
