Շմիդտների ընտանիքը Կենտուկի նահանգից, որը հավաքում է Կոկա-Կոլայի հետ կապված իրեր, որոշել է վաճառել դրանք: Այս մասին հաղորդում է Associated Press գործակալությունը: Վաճառքը պլանավորվում է իրականացնել 2011 թ. սեպտեմբերին:
Ամերիկյան այս ընտանիքի հավաքածուն սկիզբ է առել 1970-ական թվականներին: Նրա մեջ կան շշեր, հուշանվերներ, խաղալիքներ, սինիներ, օրացույցներ, լուսային ցուցապաստառներ և այլ նմանատիպ իրեր «Կոկա-Կոլայի» տարբերանշանով: Բոլոր այս իրերը (ընդհանուր առմամբ՝ 30 հազար անուն ցուցանմուշ) ցուցադրվում են խմիչքի թանգարանում, որը բացվել է Շմիդտների ընտանիքի կողմից: Մի քանի օր առաջ թանգարանը փակվել է և սկսել նախապատրաստությունը աճուրդին:
Հավաքածուի մեջ իրեր կան, որոնք իրենցից ներկայացնում են կոլեկցիոն արժեք: Այսպես, օրինակ, թանգարանի ցուցանմուշների մեջ կարելի է գտնել հուշանվերներ, որոնք արտադրվել են 19-րդ դարում, երբ «Կոկա-Կոլան» նոր էր սկսել իր արտադրությունը: Մասնագետների կարծիքով, հավաքածուի ընդհանուր արժեքը կազմում է մոտավորապես 10 մլն դոլար:
Լարի Շմիդտի խոսքերով, որը կոլեկցիոներ ընտանիքի ներկայացուցիչն է և նախկինում «Կոկա-Կոլայի» արտադրության փոքրիկ գործարան է ունեցել, հավաքածուի վաճառքի որոշումը հեշտ չի տրվել: Սակայն նա ընդգծել է, որ ինքն ու իր ընտանիքը պատրաստ են շարժվել առաջ, և ցանկանում են իրենց համախոհներին հնարավորություն տալ դառնալու հազվագյուտ ցուցանմուշների սեփականատեր:
Աշխարհում «Կոկա-Կոլայի» հավաքածու ունեցող մի քանի կոլեկցիոներներ և ակումբներ կան, որոնցում ընդգրկված են մի քանի տասնյակ մարդիկ:
