Թաիլանդի և Կամբոջիայի զինվորական ղեկավարությունը պայմանավորվել է կրակի դադարեցման մասին:
Ինչպես հայտնում է France Presse գործակալությունը, հրադադարի մասին որոշումը կայացվել է այսօր` յոթ օր տևած ակտիվ մարտերից հետո: Կրակը դադարեցնելու մասին տեղեկությունը երկու կողմերն արդեն հաստատել են:
Երկու երկրների սահմանային շրջաններում հրաձգությունը սկսվել է անցյալ ուրբաթ օրվանից: Յոթ օրվա ընթացքում թաիլանդական բանակը կորցրել է 6 մարդ, իսկ կամբոջիացիները` 8: Բացի այդ, Թաիլանդի տարածքում զոհվել է մեկ խաղաղ բնակիչ:
Հայտնի չէ, թե ով է առաջինը սկսել կրակը: Կողմերից յուրաքանչյուրը ռազմական գործողությունները սկսելուց առաջ պնդում էր, որ ստիպված է եղել պաշտպանվել: Որոշ տվյալներով, հինգշաբթի օրը հրաձգություն է տեղի ունեցել սահմանի չորս հատվածում` Տա-Մոանի և Տա-Կրաբեի հին տաճարների հարևանությամբ, որոնց պատկանելության հարցը կողմերը փորձում են ճշտել զենքի միջոցով: Հիշեցնենք նաև, որ բախումները կողմերի միջև սկսվել էին մի քանի ամիս առաջ և ընդմիջումներով շարունակվում էին մինչ այսօր:
